សោកស្តាយបំផុតក្នុងឆាកជីវិត សាន ផានិត ដែលទៅមិនទាន់ដង្ហើមម្ដាយ

កាលពីថ្មីៗនេះ ក្នុងខែមិថុនា ប៉ុន្មានថ្ងៃមុននេះ ​តារា​ចម្រៀង​ លោក សាន ផានិត ម្ចាស់​បទ “ទូរស័ព្ទ​ប្រាប់​ផង” ជួបទុក្ខ​ដ៏​ក្រៀមក្រំ​ដោយអ្នក​ម្តាយបង្កើតជាទីស្រលាញ់​បានទទួល​មរណភាព​។​ ដំណឹង​​មរណភាពនេះដែរ​ បានធ្វើ​ឲ្យ​មហាជន​ជាច្រើន​បានសម្ដែងក្ដីសោកសៅ និងចូលរួមរំលែកទុក្ខ។ អ្វីដែលកាន់តែគួរឲ្យរំជួលចិត្តជាងនេះទៅទៀតនោះ គឺ នៅក្នុងពេលប្រារព្ធពិធីបុណ្យសពរបស់អ្នកមានគុណ តារារូបនេះបានសម្រក់ទឹកភ្នែកសោកស្តាយជាអនេក ព្រោះមិនបានទៅទាន់ដង្ហើមម្ដាយ។ ជាក់ស្ដែងតាមរយៈកិច្ចសម្ភាសន៍ជាមួយសារព័ត៌មានក្នុងស្រុកមួយ លោកបានឲ្យដឹងថា លោកពិតជាសោកស្ដាយដែលមិនបានទៅទាន់ដង្ហើមម្ដាយរបស់លោក ត្បិតម្ដាយលោកស្រលាញ់លោកជាងគេ។ តែជាមួយគ្នានេះ លោកក៏បានបន្តថា នាព្រឹកថ្ងៃនោះលោកបានធ្វើទានដល់ចាស់ជរាចំនួន ១០០ នាក់ ហេតុនេះសង្ឃឹមថាបុណ្យកុសលដែលធ្វើនេះនឹងទៅដល់ម្ដាយរបស់លោកផងចុះ៕