ថាអត់ស្រឡាញ់មួយម៉ាត់ទៅ 😍😍 ឡាន Lexus RX 350 L កៅអីអង្គុយ ៧..

កាលពីចុងខែវិច្ឆិកា ឆ្នាំ ២០១៧ កន្លងទៅ Lexus បានបង្ហាញចេញជាផ្លូវការរថយន្ត Lexus RX ស៊េរីថ្មី ឈ្មោះថា Lexus RX L ដែលមានកៅអីបីជួរ និងបានបញ្ចេញលក់នៅសហរដ្ឋអាមេរិកនាចុងឆ្នាំ។ ខណៈនេះរថយន្ត RX L បានបង្ហាញវត្តមានលើទីផ្សារប្រទេសកម្ពុជា តាមរយៈការនាំចូលរបស់ហាងលក់រថយន្តកាលីបៗ Kimsrun Premium Auto។

ជាកម្រិតស្តង់ដារ Lexus RX L មានកៅអីអង្គុយចំនួន ៧ ហើយមានមុខងារដូចជាប្រព័ន្ធបើក/បត់កៅអីជួរទីបីដោយស្វ័យប្រវត្តិ, គូថក្រោយបើក/បិទដោយស្វ័យប្រវត្តិ និងមានកៅអីស្បែកមានរន្ធ សម្រាប់កៅអីជួរទី ១ និង ទី ២។ កៅអីជួរក្រោយគេថែមទាំងមានប្រព័ន្ធម៉ាស៊ីនត្រជាក់ដាច់ដោយឡែកពីគេទៀតផង។

Lexus RX L មានជាប្រភេទម៉ាស៊ីនប្រើប្រេងសាំង RX 350L ចំណុះម៉ាស៊ីន ៣,៥ លីត្រ ស៊ីឡាំង V6 កម្លាំង ២៩០ សេះ និងមានប្រអប់លេខស្វ័យប្រវត្តិ ៨ វគ្គ។ ចំពោះប្រភេទម៉ាស៊ីន Hybrid RX 450h L មានប្រើម៉ាស៊ីនចំណុះ ៣,៥ លីត្រ អមនឹងម៉ូទ័រអគ្គិសនីចំនួនពីរ ដែលមានកម្លាំងសរុប ៣០៨ សេះ។ ប្រភេទម៉ាស៊ីនសាំងមានទាំងជាប្រភេទប៉ុងមួយ (Front-Wheel Drive) និងប៉ុងពីរ (All-Wheel Drive)។

តាមការឲ្យដឹងពីភ្នាក់ងារលក់រថយន្តប្រចាំហាងខាងលើបានឲ្យដឹងថា Lexus RX L ដែលកំពុងដាក់លក់នៅកម្ពុជា ជាប្រភេទម៉ាស៊ីន Hybrid (RX 450hL) ប្រើប្រព័ន្ធបើកបរប៉ុងពីរ និងមានតម្លៃលក់ប្រហាក់ប្រហែល ១៤ ម៉ឺនដុល្លារ៕