ជនឆ្លៀតឱកាសមិនថាអ្នកស្ថិតក្នុងស្ថានភាពដូចជាពេលធ្វើដំណើរកម្សាន្ត ចូលរួមក្នុងកម្មវិធីអាពាហ៍ពិពាហ៍ បុណ្យ ឬខួបកំណើតនោះទេ បើអ្នកមិនមានការប្រុងប្រយ័ត្នឲ្យបានល្អ អ្នកនឹងជួបរឿងស៊យមិននឹកស្មាន ហើយអាចធ្វើឲ្យអ្នកបាត់បង់ទ្រព្យសម្បត្តិ ឬមានគ្រោះថ្នាក់គ្រប់ពេល។
នៅពេលថ្មីៗនេះមានគណនីហ្វេសប៊ុកនារីម្នាក់ឈ្មោះ Srey Toch Yun បានសរសេររៀបរាប់ចែករំលែកបទពិសោធន៍ដែលជនខិលខូចមួយចំនួនមានបំណងចង់លួចប្លន់ទ្រព្យសម្បត្តិរបស់យើង។ ក្នុងសារនោះនាងបានសរសេររៀបរាប់ថា «ពេលអ្នកចូលរួមកម្មវិធីផ្សេងៗក្រុមខិលខូចនឹងធ្វើទៅប្រាប់ពិធីករឲ្យប្រកាសរកម្ចាស់លេខឡាន ឧទាហរណ៍ភ្នំពេញ-XXXX ថាឡានរបស់អ្នកបានចតស្ទះ ឬចតបាំងឡានរបស់ភ្ញៀវដទៃ។
នៅពេលអ្នកចេញទៅក្រៅជនខិលខូចទាំងនោះនឹងនៅចាំអ្នក ដោយកាំភ្លើងនៅចាំភ្ជង់អ្នក ហើយជនទាំងនោះនឹងរុញអ្នកចូលឡានឲ្យបើកចេញ ហើយធ្វើសកម្មភាពប្លន់តែម្ដង។ បើអ្នកជួបរឿងទាំងនេះដោយកត្តាចៃដន្យ អ្នកត្រូវបង្ការ និងការពារខ្លួនដូចខាងក្រោម កុំប្រញាប់ទៅខាងក្រៅភ្លាមៗតាមដែលពិធីករប្រកាសរក កុំទៅម្នាក់ឯងត្រូវមានគ្នាទៅជាមួយយ៉ាងតិច២នាក់ ឬច្រើនជាងនេះ (ពិសេសអ្នកពាក់គ្រឿងអលង្ការ) កុំដើរឆ្ពោះទៅកាន់ឡានអ្នកភ្លាមៗ ត្រូវកំណត់ចម្ងាយមើលថា ឡានអ្នកពិតជាបាំង ឬរំខានឡានគេមែន ឬអត់?។
មើលជុំវិញថា តើមានមនុស្សគួរឲ្យសង្ស័យឈរក្បែរឡានរបស់អ្នកដែរ ឬទេ ត្រូវទុកចម្ងាយការពារខ្លួននិងរំដោះខ្លួនចម្ងាយពីឡានយ៉ាងតិច ២០ម៉ែត្រ បើអ្នកយល់ថាស្ថានភាពមិនប្រក្រតីនោះ»។ សារទាំងនេះមិនមែនបានន័យថា ធ្វើជាចលាចលដល់បងប្អូននោះទេ គឺមានបំណងចង់ឲ្យមានការប្រុងប្រយ័ត្នចំពោះហេតុការណ៍ដែលអ្នកគិតថា មិនសូវជាទុកចិត្ត។
ក្នុងរឿងនេះដែរក៏មានអ្នកប្រើបណ្ដាញសង្គមម្នាក់ បានប្រាប់ពីហេតុការណ៍ដែលធ្លាប់កើតឡើងលើខ្លួនរបស់គាត់ខណៈពេលដែលគាត់បើបរឡានតែម្នាក់ឯងនៅតាមផ្លូវព្រះនរោត្ដម ហើយស្រាប់តែមានមនុស្ស ២នាក់បើកម៉ូតូមកក្បែរឡានរបស់គាត់ ភ្លាមនោះបុរស ២នាក់ បានចុះពីលើម៉ូតូហើយដើរមកសំដៅបើកទ្វារឡានរបស់គាត់ តែសំណាងល្អគាត់បានចាក់សោទ្វារឡានជាប់។ បើសិនជាគាត់មិនបានចាក់សោទ្វារឡានជាប់ទេ មិនដឹងថាមានរឿងអ្វីកើតឡើងនោះទេ។ សូមមានការប្រុងប្រយ័ត្នឲ្យបានខ្ពស់ពិសេសមនុស្សស្រីដែលចូលចិត្តធ្វើដំណើរទៅណាមកណាតែម្នាក់ឯង៕
Site Title 