ភ្នំពេញ ៖ ការឃាត់ខ្លួននេះធ្វើឡើងនៅភូមិចម្រើនផល សង្កាត់បឹងទំពុន១ ខណ្ឌមានជ័យ ជនសង្ស័យម្នាក់ត្រូវបានម្ចាស់ស្លាកលេខរថយន្តពិត ចាប់ឃាត់ខ្លួនប្រគល់ឲ្យសមត្ថកិច្ចនគរបាលប៉ុស្តិ៍បឹងទំពុនទី១រកសខ្មៅ ដោយជាប់ចោទលួចស្លាកលេខរថយន្តរបស់គេ មកបំពាក់លើរថយន្តរបស់ខ្លួនឯង ។ រថយន្តដែលមានស្លាកលេខដូចគ្នានេះ ម៉ាកតូយ៉ូតាព្រូសខុសតែពណ៌ប៉ុណ្ណោះ និងមានស្លាកលេខ២AM-៣០០៥ ។
ជនសង្ស័យមានឈ្មោះ ផុន ផានិត ភេទប្រុស អាយុ២៨ឆ្នាំ ស្នាក់នៅក្នុងបុរីសូនី ក្នុងសង្កាត់ស្ទឹងមានជ័យ ខណ្ឌមានជ័យ ។ ចំណែកបក្សពួកផ្សេងទៀតគេចខ្លួនបាត់ ។ រីឯម្ចាស់លេខរថយន្តពិតឈ្មោះ ឡុង សិរីវឌ្ឍនា ភេទប្រុស អាយុ១៩ឆ្នាំ ស្នាក់នៅផ្ទះលេខ១០២ ផ្លូវលំ សង្កាត់បឹងទំពុន១ ខណ្ឌមានជ័យ ។
ប្រភពព័ត៌មានបានឲ្យដឹងថា កាលពីយប់ថ្ងៃ៩ មិថុនា ២០១៨កន្លងមក ជនរងគ្រោះយករថយន្តរបស់ខ្លួនម៉ាកតូយ៉ូតាព្រូស ពណ៌ក្រហម ស៊េរីឆ្នាំ២០០៥ ពាក់ស្លាកលេខភ្នំពេញ២AM-៣០០៥ មកចតទុកនៅកន្លែងកើតហេតុ និងចូលទៅសម្រាក ។ លុះព្រឹកឡើងថ្ងៃទី១០ មិថុនា វេលាម៉ោង៧ព្រឹក ជនរងគ្រោះបានចេញមកយករថយន្តទៅរៀន ស្រាប់តែឃើញស្លាកលេខរថយន្តរបស់ខ្លួនបាត់អស់ ។ លុះដល់ថ្ងៃទី២៦ កញ្ញា វេលាម៉ោង៣រសៀល ជនរងគ្រោះក៏បានឃើញស្លាកលេខរថយន្តរបស់ខ្លួនដែលបាត់ ត្រូវបានបំពាក់ជាប់នឹងរថយន្តម៉ាកព្រូស ពណ៌ស ស៊េរីឆ្នាំ២០១២ នៅចំណុចជិតស្តុបផ្សារសុរិយា ។
ជនរងគ្រោះបានឲ្យសមត្ថកិច្ចប៉ុស្តិ៍ផ្សារថ្មីទី៣ ធ្វើការឃាត់រថយន្តខាងលើ និងអ្នកបើកបរដែលជាជនសង្ស័យ យកមកកាន់ប៉ុស្តិ៍បឹងទំពុនទី១ ដើម្បីសាកសួរ ។ តាមមន្ត្រីប៉ូលិសប៉ុស្តិ៍បានឲ្យដឹងថា តាមចម្លើយរបស់ជនសង្ស័យថា គេមិនបានដឹងថា ស្លាកលេខរថយន្តនេះត្រូវបានគេលួចមកបំពាក់នោះទេ ព្រោះខ្លួនទិញរថយន្តនេះ មានស្លាកលេខស្រាប់តម្លៃ១២០០០ដុល្លារ គឺទិញតៗគ្នាមករត់តាក់ស៊ី ។
ចំណែកម្ចាស់ស្លាកលេខ ដែលចោរលួចនិយាយថា ក្រោយការបាត់ស្លាកលេខ ខ្លួនក៏ទៅធ្វើស្លាកលេខថ្មីមកបំពាក់ជាមួយរថយន្តដែលបាត់នោះវិញ ។ បច្ចុប្បន្នជនសង្ស័យខាងលើ ត្រូវបានសមត្ថកិច្ចប៉ុស្តិ៍បឹងទំពុន១ កសាងសំណុំរឿងបញ្ជូនខ្លួនទៅកាន់អធិការដ្ឋាននគរបាលខណ្ឌមានជ័យ កសាងសំណុំរឿងចាត់ការតាមច្បាប់ ៕
ប្រភព៖ FB
Site Title 