ប្រជាពលរដ្ឋជាង១០០គ្រួសារក្នុងចំណោមប្រជាពលរដ្ឋជាង៤០០គ្រួសារបានធ្វើការតវ៉ានិងសំណូមពរទៅដល់ រដ្ឋបាលខេត្តក៏ដូចជារាជរដ្ឋាភិបាលជួយរកដំណោះស្រាយគោលនយោបាយដល់ពួកគាត់ ខណៈពេលដែលការចុះអនុវត្តន៍ សាលក្រម ស្ថាពររបស់តុលាការកំពូល កាលពីថ្ងៃទី២៤មករាឆ្នាំ២០១៩កន្លងមក ។
ដឹកនាំដោយលោក សៀង សុខ ព្រះរាជ អាជ្ញាអមសាលា តំបូងខេត្តព្រះសីហនុ,លោកព្រះរាជអាជ្ញារង និង ឯកឧត្តម ផៃ ប៊ុនវណ្ណៈ អភិបាលរងខេត្ត ដោយមានកម្លាំងចម្រុះ របស់គណៈបញ្ជាការឯកភាពខេត្តបានធ្វើឲ្យមានការប៉ះទង្គិចគ្នារវាងប្រជាពលរដ្ឋប្រមាណជាង៤០០នាក់ជាមួយនឹងអាជ្ញាធរ ខេត្តព្រះសីហនុ រហូតមានការផ្ទុះអាវុធបំបែងហ្វូងប្រជាពលរដ្ឋ និងបានចាប់ខ្លួនប្រជាពលរដ្ឋចំនួន០៦នាក់។
ដើម្បីរារាំងការចុះអនុវត្តន៍សាលក្រមស្ថាពរនោះគេសង្កេតឃើញប្រជាពលរដ្ឋបាននាំគ្នាដុតកង់ឡាន និង គប់ដុំថ្ម រារាំងទៅលើ សមត្ថកិច្ច ដែលមានជម្លោះដីធ្លី ជាមួយឧកញ៉ាអ្នកមានលុយ មានអំណាច ក្នុងពេលដែលសមត្ថកិច្ចចម្រុះ ចុះទៅបំបែកការប្រមូល ផ្តុំតវ៉ាការពារដីធ្លីរកយុត្តិធម៌លើវិវាទដីធ្លី ស្ថិតក្នុងភូមិគគី ឃុំបិតត្រាំង ស្រុកព្រៃនប់ខេត្តព្រះសីហនុ(ជិតវត្តអូរត្រេះ ) ដែលបច្ចុប្បន្ន ពួកគាត់មិនមានជម្រកស្នាក់នៅបន្ទាប់ពីអាជ្ញាធររុះរើកាយផ្ទះរបស់ពួកគាត់អស់។
ជាក់ស្តែងនៅព្រឹកថ្ងៃទី២៨ ខែមករា ឆ្នាំ២០១៩នេះ ប្រជាពលរដ្ឋជាង១០០គ្រួសារនៅតែចេញតវ៉ាប្រឆាំងការចុះអនុវត្តសាលដីកា វាស់វែងដីធ្លីពួកគាត់រស់នៅរាល់ថ្ងៃឲ្យទៅលោក ឆាយ ណារិន ដែលឈ្នះសាលក្រមស្ថាពររបស់តុលាការកំពូលនៅចំណុចភូមិគគី។
ពួកគាត់បាននាំគ្នាស្រែកថា អយុត្តិធម៌ណាស់ ក្នុងការចុះអនុវត្តន៍សាលក្រមនេះ ព្រោះពួកគាត់បានមករស់នៅក្នុងព្រៃនេះ តាំងពីយូរយារណាស់ហើយ ព្រោះដីនេះត្រូវបានរដ្ឋាភិបាលនិរាករណ៍តាំងពីឆ្នាំ២០០២មកម៉្លេះ ហេតុអីបានតុលាការកំពូល កាត់ក្តីឲ្យទៅបុគ្គលឯកជននៅលើដីរដ្ឋទៅវិញ តើច្បាប់នៅកន្លែងណា បើចេះតែធ្វើបែបនេះ តើឲ្យប្រជាពលរដ្ឋ ទៅសង្ឃឹមអ្វី?។ដោយឡែក លោក ឆាយ ណារិន ភេទ ប្រុសអាយុ៥៦ឆ្នាំ ដែលជា ភាគីឈ្នះក្តីក្នុងសំណុំរឿងរដ្ឋប្បវេណី១៣៣ ចុះថ្ងៃទី១២ឧសភា ឆ្នាំ២០១៦ សាលដីការលេខ៣៤៨ (ឈ)ចុះថ្ងៃទី២១វិច្ឆិកាឆ្នាំ២០១៧ របស់តុលាការកំពូល បានអះអាងថា អ្វីដែលក្រុមការងារ ចម្រុះមកអនុវត្តន៍នៅថ្ងៃនេះ គឺផ្អែកទៅលើច្បាប់ជាកតិយុទ្ធមិនបានរំលោភសិទ្ធិទៅលើប្រជាពលរដ្ឋនោះទេ ព្រោះដីទាំង៧១ ហិកតានេះ ជាកម្មសិទ្ធិរបស់លោកហើយលោក បានឈ្នះក្តី លោក ហេង អ៊ុយ ហុក លោកហេងប៉ាវ ហេង វួយ និង ឈ្មោះ ជិវ ផល្លី តាំងពីឆ្នាំ២០១៦មកម្លេះ។ដូចនេះលោកធ្វើអ្វីទៅផ្លូវច្បាប់ អ្វីៗគឺការពារដោយច្បាប់។ឯចំពោះការទិញលក់នៅលើដី របស់លោក របស់ជនមួយចំនួន លោកពុំទទួលខុសត្រូវឡើយ។ខណៈពេលដែលប្រជាពលរដ្ឋស្រែកសុំរកយុត្តិធម៌និងរកដំដោះស្រាយគោលនយោបាយជូនពួកគាត់នៅព្រឹកថ្ងៃទី២៨មករានេះ ដែរ ឯកឧត្តម ផៃ ប៊ុន វណ្ណៈ អភិបាលរងខេត្តព្រះសីហនុ លោកព្រះរាជអាជ្ញារងសាលាដំបូងខេត្តបានដឹកនាំកម្លាំងចម្រុះសំអាតសំណង់ អនាធិបតេយ្យនៅទីតាំងដីខាងលើបានឲ្យដឹងថា ចំពោះការដោះស្រាយគោលនយោបាយគឺលោកមិនមានបត់បញ្ជាពីរដ្ឋបាល ខេត្តនោះទេហើយការខូចខាតសម្ភារផ្សេងៗក៏មិនមានការទទួលខុសត្រូវនោះដែរគឺលោកអនុវត្តន៍ទៅតាមសាលក្រមស្ថាពររបស់តុលាការកំពូលតែប៉ុណ្ណោះ៕
Site Title 