ភ្នំពេញ ៖ នៅរសៀលថ្ងៃទី២៣ មករា ២០១៩នេះ ក្នុងសវនាការ ជនជាប់ចោទ ឡាយ វណ្ណៈ អតីតអភិបាលខេត្តតាកែវ បដិសេធថា ពុំបានសម្លាប់ស្ត្រីមេមាយកូន៣ អ្នកនាង ចេវ សុវឌ្ឍនា ទេ ដោយសុំឱ្យតុលាការរកយុត្តិធម៌ ។
ទោះបីយ៉ាងណា ក្រោយពីស្តាប់សក្ខីកម្មរបស់ជនជាប់ចោទ ឡាយ វណ្ណៈ បានតែម្នាក់ប៉ុណ្ណោះ ក៏បានសម្រេចផ្អាកសវនាការសិន ហើយតុលាការបានលើកពេលបន្តធ្វើទៅថ្ងៃក្រោយទៀត ដោយមិនកំណត់ពេលណាឡើយ ។
សូមបញ្ជាក់ថា សវនាការធ្វើឡើងតាំងពីព្រឹកថ្ងៃទី២៣ មករា ២០១៩នេះ ដឹកនាំដោយលោក ហម ម៉េងសែ អនុប្រធានសាលាដំបូងរាជធានីភ្នំពេញ និងជាប្រធានក្រុមប្រឹក្សាចៅក្រមជំនុំជម្រះ ហើយដោយមានលោកព្រះរាជអាជ្ញារង លោក ប្លង់ សុផល ជាតំណាងអយ្យការ ។
នៅក្នុងសវានាការនាព្រឹកនេះដែរ តុលាការបានសាកសួរជនជាប់ចោទ ជុំវិញការស្លាប់របស់ជនរងគ្រោះ ឡាយ វណ្ណៈ បានសារភាពថា «លោកបានស្គាល់ ចេវ សុវឌ្ឍនា ក្នុងអំឡុងឆ្នាំ២០១៦ តាមរយៈមេគយខេត្តតាកែវម្នាក់ ។ ស្គាល់គ្នាបានជិត១ខែ ហើយបានរួមរស់ស្នេហាជាមួយនាង ចេវ សុវឌ្ឍនា ដែលជាស្រីមេម៉ាយកូន៣ បានសម្រេចដូចបំណង ក្នុងនាមគូស្នេហ៍ស៊ីជម្រៅ ។
ក្នុងរយៈពេលនៃការស្រលាញ់គ្នាលួចលាក់នេះ លោកជាមួយនាង ចេវ វឌ្ឍនា មានការរកាំរកូសគ្នាជាញឹកញាប់ ដោយសារតែជនរងគ្រោះ មានចិត្តប្រចណ្ឌ លោករឿងមានស្រីផ្សេងទៀត ថែមទាំងសុំឱ្យ លោកយកនាងធ្វើប្រពន្ធទី២ ដោយបើកចំហថែមទៀតផង ។
នៅល្ងាចថ្ងៃទី២៦ ខែមករា ឆ្នាំ២០១៨ ដែលជាថ្ងៃកើតហេតុ ឡាយ វណ្ណៈ បានទៅជួបជនរងគ្រោះ នៅផ្ទះដែលខ្លួនជួលឲ្យស្នាក់នៅ ហើយពេលនោះ ឡាយ វណ្ណៈ និងជនរងគ្រោះ បានឈ្លោះគ្នា លោកបាននិយាយគ្នាម្ដងទៀត ប៉ុន្តែនិយាយគ្នាមិនត្រូវសោះ លោកក៏ត្រឡប់ទៅវិញ ពេលនោះ ចែវ សុវឌ្ឍនា បានិយាយពីលើជណ្ដើរមកថា បើថ្ងៃនេះ បងចេញផុតពីមាត់ទ្វារផ្ទះ បងនឹងលែងបានជួបមុខអូនរហូតហើយ ពេលនោះលោកនៅតែដើរចេញ ហើយឡើងរថយន្តជិះមកផ្ទះវិញ ។ លុះពេលមកដល់ផ្ទះ ស្រាប់តែ ចាន់ រី (អ្នកបម្រើនៅផ្ទះ ចេវ សុវឌ្ឍនា) ទូរស័ព្ទមកប្រាប់ថា វឌ្ឍនា យកកាំបិតអាដៃ ប៉ុន្តែនាងនិងប្ដី បានដណ្ដើមយកកាំបិទហើយ ។ មួយសន្ទះក្រោយមកស្រាប់តែ ចាន់ រី ទូរស័ព្ទមកម្ដងទៀតថា វឌ្ឍនា ចងកសម្លាប់ខ្លួនហើយ ពេលនោះលោកមិនជឿទេ ប៉ុន្តែបានឲ្យសាម៉ៃ (ជាអ្នកបើកបរឲ្យ ឡាយ វណ្ណៈ) ទៅមើល ពេលទៅដល់សាម៉ៃ ប្រាប់តាមទូរស័ព្ទថា បងស្រីចងកសម្លាប់ខ្លួនមែន ។
ពេលនោះលោកតក់ស្លុតណាស់ ក៏បានប្រាប់ឲ្យសាម៉ៃ ទៅយកទូរស័ព្ទ២គ្រឿងរបស់នាង មកទុកដោយសារក្នុងទូរស័ព្ទ មានថតរូបលោកជាមួយនាងយ៉ាងច្រើន ព្រោះមិនចង់ឲ្យរូបភាពក្នុងទូរស័ព្ទត្រូវបែកធ្លាយដល់ដៃអ្នកកាសែត ។បន្ទាប់មកលោកក៏បានផ្តល់ដំណឹងនេះ ដោយហៅទូរស័ព្ទទៅ ឡាយ ណារិទ្ធ ជាបងប្រុស និងជាស្នងការរង ឱ្យទៅជួយមើលកន្លែងកើតហេតុ » ។ជនជាប់ចោទ ឡាយ វណ្ណៈ នៅតែបដិសេធដដែលដូចកាលពីមុនពេលសមត្ថកិច្ចចាប់ខ្លួន ថា លោកមិនបានសម្លាប់នាង ចេវ សុវឌ្ឍនា ទេ លោកបានស្បថចំពោះមុខមនុស្សនៅក្នុងសវនាការថា «បើខ្ញុំបានសម្លាប់ ចេវ សុវឌ្ឍនា មែន សូមវត្ថុស័ក្តិសិទ្ធ បរាមុខខ្ញុំ… ឲ្យខ្ញុំ និងប្រពន្ធកូនស្លាប់តៃហោង… ធ្លាក់នរក៩ជាន់ អត់ចាប់ជាតិ» ។
គួររំលឹកថា ជនរងគ្រោះឈ្មោះ ចែវ សុវឌ្ឍនា អាយុ៣៦ឆ្នាំ មានកូន៣នាក់ក្នុងបន្ទុក ត្រូវបានគេប្រទះឃើញចងកក្នុងបន្ទប់ដេកនៃផ្ទះជួលក្នុងភូមិផ្សារតាកោរ សង្កាត់រការក្នុង ក្រុងដូនកែវ ខេត្តតាកែវ កាលពីល្ងាចថ្ងៃទី២៦ ខែមករា ឆ្នាំ២០១៨ មួយឆ្នាំមុន ។ កាលពីពេលនោះ សមត្ថកិច្ចខេត្តតាកែវ អះអាងថា ជនរងគ្រោះ ធ្វើអត្តឃាតខ្លួនឯង ប៉ុន្តែក្រោយការស៊ើបអង្កេតរបស់សមត្ថកិច្ចក្រសួងមហាផ្ទៃមួយក្រុម បង្ហាញថា ស្ត្រីជនរងគ្រោះត្រូវបានធ្វើឃាតទៅវិញ ទើបសមត្ថកិច្ចជំនាញរបស់នាយកដ្ឋានព្រហ្មទណ្ឌក្រសួងមហាផ្ទៃ ឈានដល់ការឃាត់ខ្លួនក្រុមជនសង្ស័យទាំង៤នាក់រួមមាន ៖ឈ្មោះ ឡាយ វណ្ណ: ភេទប្រុស អាយុ៤៥ឆ្នាំ អតីតអភិបាលខេត្តតាកែវ និងឈ្មោះ ឡាយ ណារិទ្ធ ភេទប្រុស អាយុ៤៦ឆ្នាំ អតីតស្នងការរងខេត្តតាកែវ ជាប់ពីបទឃាតកម្ម យោងតាមមាត្រា១៩៩ នៃក្រមព្រហ្មទណ្ឌ ។ឈ្មោះ ម៉េន សាម៉ៃ ភេទប្រុស អាយុ៣៦ឆ្នាំ ជាតៃកុងឡានរបស់ លោក ឡាយ វណ្ណ: និងឈ្មោះ ជឹម វុធ ហៅ ថូត ភេទប្រុស អាយុ៤១ឆ្នាំ ជាអ្នកបម្រើនៅផ្ទះរបស់លោកស្រី ចែវ សុវឌ្ឍនា ពីបទលាក់បំបាំងតម្រុយ យោងតាមមាត្រា៥៣២ នៃក្រមព្រហ្មទណ្ឌ ៕
Site Title 