Kovacic បាននិយាយពេញៗមាត់ថាចង់ចាកចេញពី Real Madrid ព្រោះមូលហេតុមួយនេះ

កីឡាករ Mateo Kovacic បានអស់ភាពអំណត់អត់ធ្មត់តទៅទៀតហើយជាមួយក្រុម Real Madrid ខណៈដែលខ្សែបម្រើរូបនេះបានសារភាពពេញៗមាត់ថាខ្លួនចង់ចាកចេញពី Real ដើម្បីផ្លាស់ទៅកន្លែងថ្មីមួយដែលអាចអនុញ្ញាតឲ្យរូបគាត់បង្ហាញខ្លួនលើទីលានប្រកួតបានញឹកញាប់ជាងនេះ។ កីឡាករនៃក្រុមជម្រើសជាតិក្រូអាតរូបនេះបានផ្លាស់មកកីឡដ្ឋាន Bernabeu របស់ Real Madrid កាលពីឆ្នាំ ២០១៥ ដោយការផ្ទេរចេញពីក្រុម Inter Milan របស់អ៊ីតាលីក្នុងតម្លៃខ្លួនផ្ទេរដែលត្រូវបានគេរាយការណ៍ឲ្យដឹងថាប្រមាណជា ៣៥ លានអឺរ៉ូ។ ប៉ុន្តែគាត់បានជួបការលំបាកដោយការប្រឈមមុខជាមួយខ្សែបម្រើរួមសញ្ជាតិរបស់គាត់ គឺកីឡាករ Luka Modric, ខ្សែបម្រើអាល្លឺម៉ង់ Toni Kroos និង Casemiro ខ្សែបម្រើប្រេស៊ីល ក្នុងការដណ្ដើមយកកៅអី ១១ នាក់ដំបូង។

ហើយបន្ទាប់ពីការចាកចេញរបស់អតីតគ្រូបង្វឹក លោក Zinedine Zidane ដែលបានជួយឲ្យ Real ឈ្នះពាន Champions League បីរដូវកាលជាប់ៗគ្នានោះ Kovacic ក៏ត្រូវបានក្លិបល្បីៗជាច្រើនសម្លឹងឃើញ ស្របពេលដែលពេលនេះគាត់បានបើកភ្លើងខៀវក្នុងការចាកចេញពី Madrid ជាកន្លែងដែលគាត់ចូលលេងបានតែ ៣៧ ប្រកួតក្នុងលីក ក្នុងរយៈពេល ៣ ឆ្នាំកន្លងមកនេះ។ “ខ្ញុំចង់បង្ហាញខ្លួនឲ្យបានច្រើនប្រកួត ហើយរឿងដែលសំខាន់នោះគឺខ្ញុំចង់ចាកចេញពី Real Madrid ។” Kovacic បានប្រាប់កាសែត Marca ។ “ខ្ញុំចូលចិត្តបាល់ទាត់ និងចង់បង្ហាញខ្លួនឲ្យច្រើននៅលើទីលានប្រកួត។ ខ្ញុំចង់មានឱកាសចូលលេងជម្រើសដំបូងឲ្យក្រុមផ្សេង ព្រោះបើមិនបានចូលលេង គឺខ្ញុំសប្បាយចិត្តមិនចេញទេ។” Tottenham ដែលជាក្រុមនៃលីកកំពូលរបស់អង់គ្លេសមួយនេះត្រូវបានគេផ្សាភ្ជាប់ជាមួយការផ្ទេរ Kovacic កាលពីកន្លងទៅ។

ប្រែសម្រួល ៖ ភក្ដី

ប៊ែលហ្ស៊ីកមានភាគរយខ្ពស់ក្នុងការឡើងទៅវគ្គ ១៦ ក្រុមនៅ World Cup បន្ទាប់ពី Lukaku និង Hazard ស៊ុតបញ្ចូលទីម្នាក់ពីរគ្រាប់ផ្ដួលទុយណេហ្ស៊ី ៥-២

ខ្សែប្រយុទ្ធ Romelu Lukaku និង Eden Hazard បានជួយបង្ហើនឱកាសឲ្យក្រុមជម្រើសជាតិប៊ែលហ្ស៊ីករបស់ពួកគេក្នុងការកក់កៅអីឡើងទៅកាន់វគ្គ ១៦ ក្រុមនៃការប្រកួតពានរង្វាន់បាល់ទាត់ពិភពលោកឆ្នាំ ២០១៨ នេះ បន្ទាប់ពីពួកគេទាំង ២ បំប៉ើងសំណាញ់ទីបានសម្រេចម្នាក់ ២ គ្រាប់ ខណៈដែលប៊ែលហ្ស៊ីកលត់ក្រុមជម្រើសជាតិទុយណេហ្ស៊ីក្នុងលទ្ធផល ៥ គ្រាប់ទល់នឹង ២ ។ ជ័យជម្នះដែរបានធ្វើឲ្យប៊ែលហ្ស៊ីកនៅពីលើក្រុមជម្រើសជាតិអង់គ្លេសដែលឈរលើចំណាត់លេខ ២ ក្នុងពូល G ។

រីឯទុយណេហ្ស៊ីដែលបានបរាជ័យអស់ ២ ប្រកួតនៃ ៣ ប្រកួតរបស់ពួកគេនៅក្នុងពូលនោះលែងមានឱកាសឡើងទៅវគ្គបន្តហើយ បើទោះបីជាប៉ាណាម៉ា ស៊ីអង់គ្លេសមួយលានគ្រាប់ទល់នឹងសូន្យក៏ដោយ ខណៈដែលពួកគេនឹងក្លាយជាក្រុមជម្រើសជាតិនៃទ្វីបអាហ្វ្រិកទី ៣ ដែលនឹងត្រូវបានជម្រុះចេញពីការប្រកួតពាន World Cup ឆ្នាំនេះ បន្ទាប់ពីអេហ្ស៊ីប និងម៉ារ៉ុក។ ហើយក្រុមដែលមកពីអាហ្វ្រិកដែលនៅមានឱកាសឡើងទៅវគ្គ ១៦ ក្រុមនៅ World Cup គឺមានតែនីហ្សេរីយ៉ា និងសេណេហ្គាល់ប៉ុណ្ណោះ។

ប្រែសម្រួល ៖ ភក្ដី

វឌ្ឍនាកា បានសម្រេចចិត្តវិលត្រលប់មករកទ្រនំចាស់ បឹងកេត របស់ខ្លួនវិញ

ក្លិបបឹងកេតបានប្រកាសជាផ្លូវការអំពីការវិលត្រលប់មកចុះចូលជាថ្មីជាមួយក្លិបរបស់ពួកគេពីសំណាក់ខ្សែប្រយុទ្ធ ចាន់ វឌ្ឍនាកា ខណៈដែលគេជឿថាការវិលមករកទ្រនំចាស់របស់ខ្លួននេះគឺព្រោះតែខ្សែប្រយុទ្ធឆ្នើមនៃក្រុមជម្រើសជាតិកម្ពុជារូបនេះចរចារជាមួយក្លិបនៅបរទេសមិនបានសម្រេច។ វឌ្ឍនាកា កាលពីមួយរយៈមុនត្រូវបានគេផ្សាភ្ជាប់គាត់ជាមួយនឹងការផ្ទេរទៅលេងឲ្យក្លិបសិង្ហបុរី Home United ប៉ុន្តែគាត់បានបដិសេធ និងថាពាក្យចរចាមអារ៉ាមទាំងនោះមិនមែនជាពិតទេ។ អំឡុងពេលបដិសេធចំពោះពាក្យចរចាមអារ៉ាមនោះ កីឡាករវ័យ ២៤ រូបនេះក៏បានបង្ហើបផងដែរថាខ្លួនកំពុងចរចារជាមួយក្លិបបរទេសមួយ ប៉ុន្តែទំនងជាចរចារគ្នាមិនត្រូវហើយមើលទៅ ទើបបានគាត់សម្រេចចិត្តត្រលប់មកចុះចូលជាមួយក្លិបចាស់ បឹងកេត របស់ខ្លួនវិញ។

មិនមែន ១ ប៉ុន្តែ ២ ប្រេស៊ីលបានធ្វើស៊ីកូស្ដារីកា និងឡើងឈរលើកំពូលតារាងនៃពូល E

ខ្សែបម្រើ Philippe Coutinho និងខ្សែប្រយុទ្ធ Neymar បានចែកគ្នាបំប៉ើងសំណាញ់ទីម្នាក់មួយគ្រាប់ចុងម៉ោងជួយឲ្យក្រុមជម្រើសជាតិប្រេស៊ីលផ្ដួលកូស្ដារីកាជាមួយលទ្ធផល ២ គ្រាប់ទល់នឹង ០ នៅក្នុងការប្រកួតពានរង្វាន់បាល់ទាត់ពិភពលោកឆ្នាំ ២០១៨ វគ្គជម្រុះនៃពូល E ។ ជាមួយនឹងលទ្ធផលជ័យជម្នះនេះដែរបានធ្វើឲ្យប្រេស៊ីលដែលបានប្រកួតស្មើជាមួយស្វីសកាលពីប្រកួតបើកឆាកនោះឡើងទៅឈរលើកំពូលតារាងនៃពូល E យ៉ាងរំភើយ ហើយពួកគេត្រូវការត្រឹមតែលទ្ធផលស្មើប៉ុណ្ណោះសម្រាប់ប្រកួតចុងក្រោយ ដើម្បីឲ្យពួកគេអាចឡើងទៅកាន់វគ្គ ១៦ ក្រុមនៃការប្រកួតពាន World Cup ខណៈដែលប្រកួតចុងក្រោយគឺពួកគេនឹងត្រូវប៉ះគ្នាជាមួយស៊ែប៊ី។ ចំណែកកូស្ដារីកាដែលមិនមានសូម្បីតែមួយពិន្ទុនៅក្នុងដៃនោះទំនងជាមិនមានឱកាសឡើងទៅវគ្គបន្តទៀតទេ បើទោះបីពួកគេនៅសល់មួយប្រកួតទៀតក្នុងដៃដែលពួកគេត្រូវប៉ះគ្នាជាមួយស្វីសក៏ដោយ។

ប្រែសម្រួល ៖ ភក្ដី

អតីតខែលការពាររបស់ Real Madrid មួយរូបសរសើរ Modric ថាជាកីឡាករលេខ ១០ ល្អបំផុតលើពិភពលោក

អតីតខ្សែការពាររបស់ក្រុម Real Madrid កីឡាករ Alvaro Arbeloa ជឿជាក់ថាខ្សែបម្រើ Luka Modric គឺជាកីឡាករដែលពាក់លេខ ១០ ល្អបំផុតនៅលើពិភពលោក។ Modric បានបង្ហាញខ្លួន និងជួយឲ្យក្រុមជម្រើសជាតិក្រូអាតលត់ក្រុមជម្រើសជាតិអាហ្សង់ទីនដោយលទ្ធផល ៣-០ នៃការប្រកួតពាន World Cup នាវគ្គជម្រុះក្នុងពូល D កាលពីថ្ងៃព្រហស្បតិ៍ ខណៈដែលគាត់ក៏រកបានគ្រាប់បាល់បញ្ចូលទីមួយគ្រាប់ផងដែរ ខណៈដែលខ្សែប្រយុទ្ធឆ្នើមអាហ្សង់ទីន Lionel Messi ដែលក៏ពាក់អាវលេខ ១០ ដូច Modric ដែរនោះកំពុងតែត្រដរខ្យល់ បន្ទាប់ពី ២ ប្រកួតរបស់ពួកគេរកជ័យជម្នះមិនទាន់ឃើញ(ស្មើពេលប៉ះអ៊ីស្លង់ និងចាញ់ពេលប៉ះជាមួយក្រូអាត)។

Alvaro Arbeloa អតីតខ្សែការពាររបស់ក្រុម Real Madrid

ទន្ទឹមនឹងការបង្ហាញទម្រង់លេងល្អពីសំណាក់ Modric បានធ្វើឲ្យ Arbeloa ដែលបានចំណាយពេលអស់ ៧ រដូវកាលលេងនៅក្លិបអេស្ប៉ាញ Real Madrid រូបនេះជឿថា Modric ពិតជាសមជាកីឡាករពាក់លេខ ១០ ដែលល្អជាងគេបំផុតនៅលើពិភពលោក។ “កីឡាករពាក់លេខ ១០ ដែលល្អបំផុតនៅក្នុងពិភពលោកគឺ Luka Modric ។” Arbeloa បានសរសេរយ៉ាងដូច្នេះនៅលើទំព័របណ្ដាញសង្គម Twitter របស់គាត់ដោយបានអមមកជាមួយនូវរូបរបស់ Modric ផងដែរ។ Modric រកគ្រាប់បាល់បញ្ចូលទីបាន ២ គ្រាប់ហើយនៅក្នុងព្រឹត្តិការណ៍នៃការប្រកួតពានបាល់ទាត់ពិភពលោកឆ្នាំ ២០១៨ នេះ ខណៈដែលជម្រើសជាតិរបស់គាត់កំពុងបោះជំហានទៅកាន់វគ្គ ១៦ ក្រុមជាលើកដំបូងចាប់តាំងពីឆ្នាំ ១៩៩៨ ។

ប្រែសម្រួល ៖ ភក្ដី

មិនមែន ១ ប៉ុន្តែ ២ ប្រេស៊ីលបានធ្វើស៊ីកូស្ដារីកា និងឡើងឈរលើកំពូលតារាងនៃពូល E

ប្រែសម្រួល ៖ ភក្ដី

លទ្ធផល៣គូយប់មិញនេះ ៖ ព័រទុយហ្គាល់ ជាមួយ ម៉ារ៉ុក ,អ៊ុយរ៉ាហ្គាយ និង អារ៉ាប៊ីសាអូឌីត,អេស្បាញ និង អ៉ីរ៉ង់

(ម៉ូស្គូ) ការប្រកួត World Cup 2018 នៅរុស្ស៊ី នាយប់ថ្ងៃទី២០ ខែមិថុនា ឆ្នាំ២០១៨ មាន៣គូក្នុងនោះមាន៖ ព័រទុយហ្គាល់ ឈ្នះម៉ារ៉ុក ១-០ ឡើងឈរកំពូលតារាងនៃពូល B ចំណែកអ៊ុយរ៉ាហ្គាយ កក់កៅអីទៅវគ្គក្រុម ខណៈអេស្បាញ បំបាក់ អ៉ីរ៉ង់។

ទី១៖ ព័រទុយហ្គាល់ ជាមួយ ម៉ារ៉ុក

អតីតក្រុមជើងឯកអឺរ៉ុប ព័រទុយហ្គាល់ បានយកឈ្នះក្រុមមកពីទ្វីបអាហ្រ្វិក ម៉ារ៉ុក ១-០។ ជោគជ័យនេះ ធ្វើឲ្យព័រទុយហ្គាល់ ទទួលបាន ៣ពិន្ទុលើកទី១ បន្ថែមពីលើប្រកួតលើកទី១ ដែលទទួលបានមួយពិន្ទុ ឡើងទៅឈរកំពូលតារាងនៃពូល B បណ្តោះអាសន្ននៅ World Cup 2018 ដែលមានរុស្ស៊ីធ្វើម្ចាស់ផ្ទះ។

នេះជាការសឹកម៉ារ៉ុកបានសម្រេចវិញ ក្រោយពេលព័រទុយហ្គាល់ចាញ់ម៉ារ៉ុក ៣-១ កាលពី World Cup 1986 នៅប្រទេសមិចស៊ិក ហើយម៉ារ៉ុកបានក្លាយជាក្រុមទី២ បន្ទាប់ពីអេហ្ស៊ីប ដែលជ្រុះចេញពី World Cup 2018 មុនគេ ក្រោយចាញ់២ប្រកួតដូចគ្នា។ កីឡាករខ្សែប្រយុទ្ធ Cristiano Ronaldo ជាអ្នកតែតគ្រាប់ជ័យជម្នះឲ្យព័រទុយហ្គាល់តាំងពីនាទីទី៤ ក្រោយទទួលបានបាល់ពីមិត្តរួមក្រុម Joao Moutinho។ គ្រាប់ពីការតែតនេះជាគ្រាប់ទី៤ របស់កីឡាករវ័យ ៣៣ឆ្នាំ Ronaldo ។

ទី២៖ អ៊ុយរ៉ាហ្គាយ និង អារ៉ាប៊ីសាអូឌីត

ក្រុមបាល់ទាត់ជម្រើសជាតិអ៊ុយរ៉ាហ្គាយ បានក្លាយជាក្រុមទី២ ដែលបានកក់កៅអីឡើងទៅវគ្គ ១៦ក្រុមចុងក្រោយ។ ១គ្រាប់ជ័យជម្នះរបស់ក្រុមមកពីតំបន់អាមេរិកឡាទីន អ៊ុយរ៉ាហ្គាយ កើតឡើងនៅនាទីទី២៣ ពីការធ្វើបានសម្រេចដោយកីឡាករខ្សែប្រយុទ្ធ Luis Suarez ៣ពិន្ទុបន្ថែមនេះដែរបានធ្វើឲ្យអ៊ុយរ៉ាហ្គាយ បន្តឈរនៅលេខ២ ក្នុងពូល A មាន៦ពិន្ទុស្មើនឹងក្រុមកំពូលតារាងរុស្ស៊ី ក្នុងនាមជាក្រុមឈ្នះ២ប្រកួតដូចគ្នា អ៊ុយរ៉ាហ្គាយត្រូវជួបម្ចាស់ផ្ទះរុស្ស៊ី ខណៈក្រុមហាលអាវដូចគ្នាអារ៉ាប៊ីសាអូឌីត ប៉ះអេហ្ស៊ីបនៅថ្ងៃទី២៥ ខែមិថុនា ឆ្នាំ២០១៨ បញ្ចប់វគ្គជម្រុះនៃពូល A។

ទី៣៖ អេស្បាញ និង អ៉ីរ៉ង់

ក្រុមបាល់ទាត់ជម្រើសជាតិអេស្ប៉ាញ រកបាន៣ពិន្ទុលើកទី១ ក្រោយយកឈ្នះក្រុមអាស៊ី អ៉ីរ៉ង់ ១-០ បញ្ចប់ជុំទី២ ប្រចាំពូល B នៃ FIFA World Cup 2018 នៅប្រទេសរុស្ស៊ី។ ការស៊ុតបញ្ចូលទីតែ១គ្រាប់ពីសំណាក់ខ្សែប្រយុទ្ធ Diego Costa នៅនាទីទី៥៤ ដើមវគ្គទី២ បានជួយឲ្យអតីតក្រុមជើងឯក World Cup ឆ្នាំ២០១០មួយនេះឡើងទៅឈរលេខ២ ប្រចាំពូល B បណ្តោះអាសន្នតាមពីក្រោយព័រទុយហ្គាល់ដែលរកបាន ៤ពិន្ទុដូចគ្នា ១ប្រកួតចុងក្រោយ ដើម្បីបញ្ចប់វគ្គសន្សំពិន្ទុនៃពូល B គឺអេស្ប៉ាញត្រូវជួប ម៉ារ៉ុក ស្របពេលព័រទុយហ្គាល់ ប៉ះអ៉ីរ៉ង់ នៅចុងសប្តាហ៍នេះ៕

លទ្ធផល៣គូប្រកួត នៅយប់ថ្ងៃអាទិត្យ ឥន្រ្ទីដែកអាល្លឺម៉ង់ ចាញ់ ម៉ិចស៊ីកូ, ប្រេស៊ីល ១ស្មើ ស្វីស ,ស៊ែប៊ី ឈ្នះកូស្តារីកា

(ម៉ូស្គូ)៖ ការប្រកួត World Cup 2018 នៅរុស្ស៊ី នាយប់ថ្ងៃអាទិត្យទី១៧ ខែមិថុនា ឆ្នាំ២០១៨ មាន៣គូ ក្នុងនោះមាន៖ ស៊ែប៊ី ឈ្នះ កូស្តារីកា, ឥន្រ្ទីដែកអាល្លឺម៉ង់ ចាញ់ ម៉ិចស៊ីកូ, ខណៈ ប្រេស៊ីល ស្មើជាមួយ ស្វីស។

ទី១៖ ស៊ែបី ឈ្នះ កូស្តារីកា ១-០ ស៊ុតបញ្ចូលទីដោយបាល់ Free kick ពីសំណាក់កីឡាករ Alexadrew Kolarov នៅនាទីទី៥៩។

ទី២៖ ឥន្រ្ទីដែកអាល្លឺម៉ង់ ចាញ់ ម៉ិចស៊ីកូ ១-០ នៅនាទីទី៣៥ ដោយកីឡាករ H. LOZANO។

ទី៣៖ ជើងខ្លាំង ប្រេស៊ីល បានត្រឹមស្មើជាមួយ ស្វីស ១-១ ដោយការស៊ុតបញ្ជូលទីនាំមុខដោយកីឡាករប្រេស៊ីល P. Coutinho ពាក់លេខ១១ នៅនាទីទី២០ ចំណែកក្រុមជំរើសជាតិស្វីស តែតបាល់បញ្ជូលទីប្រេស៊ីលវិញ ដោយកីឡាករ Zuber ពាក់ស្លាកលេខ១៤ នៅនាទីទី៥០៕

អាហ្សង់ទីនបានត្រឹមស្មើអ៊ីស្លង់ក្នុងប្រកួតដំបូងនៃវគ្គចែកពូលនៅ World Cup

ក្រុមជម្រើសជាតិអាហ្សង់ទីនបានត្រឹមស្មើជាមួយអ៊ីស្លង់នៅក្នុងការប្រកួតដំបូងនៃពានរង្វាន់បាល់ទាត់ពិភពលោកឆ្នាំ ២០១៨ នេះនាវគ្គជម្រុះចែកពូល ខណៈដែលខ្សែប្រយុទ្ធឆ្នើម Lionel Messi បានខកខានឱកាសក្នុងការរកគ្រាប់បាល់បញ្ចូលទីពីការស៊ុតបាល់ពិន័យ ១១ ម៉ែត្រទៅលើអ៊ីស្លង់។

តែទោះជាយ៉ាងណា ជាមួយនឹងលទ្ធផលមួយស្មើនេះប្រហែលជាមិនមែនឧបសគ្គធំសម្រាប់អាហ្សង់ទីនដែលខំស្កាត់មកតាំងពីទ្វីបអាមេរិកខាងត្បូងមួយនេះឡើយ ដោយពួកគេនៅសល់ ២ ប្រកួតទៀតនៃការប្រកួតក្នុងពូលរបស់ពួកគេដើម្បីបន្តក្ដីសង្ឃឹមឡើងទៅវគ្គបន្តនៃការប្រកួតពាន World Cup ។

ប្រកួតក្រោយអាហ្សង់ទីននឹងត្រូវប៉ះគ្នាជាមួយក្រូអាត ខណៈការប្រកួតនឹងធ្វើឡើងនៅថ្ងៃទី ២២ មិថុនានេះ។

ប្រែសម្រួល ៖ ភក្តី

សហព័ន្ធបាល់ទាត់អេហ្ស៊ីបបានប្រកាសឲ្យដឹងនូវដំណឹងល្អមួយពាក់ព័ន្ធជាមួយ Salah

សហព័ន្ធបាល់ទាត់អេហ្ស៊ីបបានប្រកាសថាខ្សែប្រយុទ្ធ Mohamed Salah បានជាសះស្បើយហើយ និងត្រៀមជាស្រេចក្នុងការបង្ហាញខ្លួនសម្រាប់ការប្រកួតរវាងក្រុមជម្រើសជាតិអេហ្ស៊ីប និងម្ចាស់ផ្ទះរុស្ស៊ីនាថ្ងៃអង្គារសប្ដាហ៍ក្រោយនេះដែលជាការប្រកួតនៃពានរង្វាន់បាល់ទាត់ពិភពលោក វគ្គចែកពូល។

កីឡាករវ័យ ២៥ ឆ្នាំ, Salah មិនត្រូវបានដាក់ឲ្យចូលលេងទេ អំឡុងពេលជម្រើសជាតិរបស់គាត់ប្រកួតចាញ់អ៊ុយរ៉ូហ្គាយដោយលទ្ធផល ១-០ នៅក្នុងការប្រកួតបើកពូលរបស់ពួកគេនៅ World Cup កាលពីថ្ងៃព្រហស្បតិ៍។Salah បានរងរបួសស្មារហូតដល់ត្រូវបង្ខំចិត្តដើរចេញពីទីលានប្រកួតនៃពានរង្វាន់ Champions League វគ្គផ្ដាច់ព្រ័ត្ររវាងក្រុមហង្សក្រហម Liverpool និងក្រុមយក្សអេស្ប៉ាញ Real Madrid កាលពីខែមុន ខណៈដែលរបួសរបស់គាត់នេះដែរបានកើតឡើងដោយសារការប៉ះទង្គិចគ្នាជាមួយខ្សែការពារឆ្នើម Sergio Ramos ។

តែទោះជាយ៉ាងណាពេលនេះសហព័ន្ធអេហ្ស៊ីបបានប្រាប់ឲ្យដឹងថា ៖ “Salah បានជាសះស្បើយ និងអាចចូលលេងបានតាំងពីការប្រកួតជាមួយអ៊ុយរ៉ូហ្គាយ ប៉ុន្តែគ្រូបង្វឹកមិនហ៊ានប្រថុយដាក់ឲ្យគាត់ចូលលេង។ បើមានគាត់ប្រហែលជាលទ្ធផលអាចនឹងខុសគ្នា ប៉ុន្តែយើងមិនអាចដឹងទេអំពីរឿងនោះ។

យើងមិនចង់ឲ្យមានការស្ដាយក្រោយកាលពីប្រកួតមុន ទើបមិនឲ្យ Salah លេង ប៉ុន្តែប្រកួតក្រោយគាត់នឹងអាចចូលលេងបានហើយ”។
ប្រែសម្រួល ៖ ភក្ដី