សមត្ថកិច្ចប៉ូលីសក្រុង ឆ្មក់បង្ក្រាបទីតាំងបាញ់ត្រី ៣ទីតាំង នៅក្នុងខណ្ឌដូនពេញ ឃាត់ខ្លួនមនុស្សប្រុសស្រី១៨នាក់ និងដកហូតទូហ្គេមបានចំនួន…(មានវិដេអូ)

រាជធានីភ្នំពេញ ៖ប្រតិបត្តិការខាងលើនេះបានធ្វើឡើងនៅវេលាម៉ោង០៨:៤០នាទីយប់ ថ្ងៃទី២០ ខែកញ្ញា ឆ្នាំ២០១៨ នៅត្រង់ចំណុចជិតវិហារឥស្លាម ស្ថិតក្នុងភូមិ២១ សង្កាត់ស្រះចក ខណ្ឌដូនពេញ ។

កម្លាំងនគរបាលការិយាល័យព្រហ្មទណ្ឌកម្រិតស្រាល នៃស្នងការនគរបាលរាជធានីភ្នំពេញ ដឹកនាំដោយលោកវរសេនីយ៍ឯក ប៊ុន សិត្យា បានបើកប្រតិបត្តិការចុះបង្ក្រាបទីតាំងបាញ់ត្រី ៣ទីតាំង នៅក្នុងខណ្ឌដូនពេញ ដោយឃាត់ខ្លួនមនុស្សប្រុសស្រីបានចំនួនជាច្រើននាក់នាក់ និងទូហ្គេមជាច្រើនគ្រឿងផងដែរ។

តាមប្រភពសមត្ថកិច្ចបានអោយដឹងថា៖ ក្រោយពីការតាមដានមុខសញ្ញានិងឃ្លាំមើលអស់យៈពេលជិតបីខែមកហើយ ទើបដឹងច្បាស់នឹងបើកប្រតិបត្តិការដោយសហការជាមួយកម្លាំងនគរបាលខណ្ឌដូនពេញ និងកម្លាំងនគរបាលប៉ុស្តិ៍ ចុះបង្ក្រាបតែម្ដង ដោយធ្វើការឃាត់ខ្លួនមនុស្សប្រុសស្រីចំនួន ១៨នាក់ និងដកហូតទូហ្គេមបានសរុប ១០គ្រឿង (ក្នុងនោះមានទូហ្គេមបាញ់ត្រី ចំនួន ៥គ្រឿង និងទូហ្គេមបៀរ ចំនួន ៥គ្រឿង) ។

បច្ចុប្បន្នជនសង្ស័យរួមទាំងទូហ្គេមខាងលើត្រូវបានឃាត់ខ្លួននិងយកទៅ ការិយាល័យព្រហ្មទណ្ឌកម្រិតស្រាល នៃស្នងការនគរបាលរាជធានីភ្នំពេញ ដើម្បីចាត់ការតាមនិតិវិធីច្បាប់៕