ខ្សែប្រយុទ្ធវ័យក្មេងរបស់ក្រុមជម្រើសជាតិបារាំងគឺកីឡាករ Kylian Mbappe នឹងបរិច្ចាគប្រាក់របស់គេដែលរកបានពីការប្រកួតពានរង្វាន់បាល់ទាត់ពិភពលោក FIFA World Cup ទៅជួយក្មេងៗកំព្រា ដែលគ្មានទីពឹង ហើយរូបគេបាននិយាយដូច្នេះថា…

ខ្សែប្រយុទ្ធវ័យក្មេងរបស់ក្រុមជម្រើសជាតិបារាំងគឺកីឡាករ Kylian Mbappe នឹងបរិច្ចាគប្រាក់របស់គេ ដែលរកបាននៅក្នុងព្រឹតិ្តការណ៍បាល់ទាត់ពិភពលោក FIFA World Cup សរុបចំនួន 265,000 ផោន (ប្រហែល 350,000 ដុល្លារ) ទៅកាន់អង្គការកុមារកំព្រាមួយ ដើម្បីជួយទ្រទ្រង់ទៅដល់ក្មេងៗកំព្រាទាំងនោះ។

កាលពីពេលថ្មីៗនេះខ្សែប្រយុទ្ធ Kylian Mbappe បាននិយាយប្រាប់ទៅកាន់អ្នកសារពត៌មានថា៖ ប្រាក់ដែលគេរកបានពីការប្រកួតពានរង្វាន់បាល់ទាត់ពិភពលោក FIFA World Cup នៅឆ្នាំនេះ រូបគេនឹងបរិច្ចាគទៅជួយក្មេងៗកំព្រា ដែលគ្មានទីពឹង ព្រោះរូបគេលេងបាល់ គឺមិនមែនដើម្បីលុយឡើយ។

នៅក្នុងព្រឹតិ្តការណ៍បាល់ទាត់ពិភពលោក FIFA World Cup នៅរុស្សីឆ្នាំនេះក្នុងមួយប្រកួតខ្សែប្រយុទ្ធ Kylian Mbappe រកបានប្រាក់ចំនួន 17,000 ផោន បូករួមជាមួយនឹងប្រាក់ឧបត្ថម្ភពីសហព័ន្ធបាល់ទាត់បារាំងទៀត Mbappe ទទួលបានទឹកប្រាក់ពេញមួយព្រឹតិ្តការណ៍សរុបចំនួន 265,000 ផោន ដែលប្រហែល 350,000 ដុល្លារ។ ហើយប្រាក់ដែលរូបគេទទួលបាននេះគឺខ្សែប្រយុទ្ធវ័យ 19 ឆ្នាំរូបនេះមិនយកដាក់ហោប៉ៅឡើយ គឺរូបគេនឹងបរិច្ចាគទៅកាន់អង្គការកុមារកំព្រាមួយដើម្បីជួយដល់ក្មេងៗកំព្រាជាច្រើនដែលគ្មានទីពឹង៕

ប្រភព៖ FB

ទីបំផុតក្រុមតោខៀវ Chelsea និងលោក Antonio Conte បានឈានដល់ការចែកផ្លូវគ្នា

ក្រុមតោខៀវ Chelsea ទីបំផុតបានឈានដល់ការចែកផ្លូវគ្នាជាមួយគ្រូបង្វឹកលោក Antonio Conte ខណៈដែលមានសេចក្ដីរាយការណ៍ខ្លះបានខ្សឹបប្រាប់ឲ្យដឹងថាបុរសជនជាតិអ៊ីតាលីរូបនេះត្រូវបានគេរំសាយកុងត្រាចោលតាំងពីថ្ងៃព្រហស្បតិ៍មកម្ល៉េះ ដោយលោក Maurizio Sarri នឹងមកកាន់តំណែងអ្នកចាត់ការជំនួសគាត់។

ទន្ទឹមនឹងនោះក្រុមកីឡាកររបស់ Chelsea បានជូនពរទៅកាន់លោក Conte លាយឡំជាមួយនឹងសារលាគ្នា មុនពេលដែលក្រុមនៃលីកកំពូលរបស់អង់គ្លេសមួយនេះចេញសេចក្ដីថ្លែងការណ៍មួយយ៉ាងដូច្នេះថា ៖ “អំឡុងពេលនៃការដឹកនាំរបស់លោក Antonio Conte ក្លិបរបស់យើងបានឈ្នះ Premier League ជាលើកទី ៦ និងឈ្នះពាន FA Cup ជាលើកទី ៨ ។ ហើយនៅរដូវកាលដែលយើងបានលើកពាន Premier League គឺក្លិបរបស់យើងបានបំបែកកំណត់ត្រាជាមួយនឹងការទទួលបានជ័យជម្នះ ៣០ ប្រកួតនៃ ៣៨ ប្រកួតក្នុងលីក។ លើសពីនោះពួកយើងទទួលបានកំណត់ត្រាឈ្នះ ១៣ ប្រកួតជាប់ៗគ្នានៃការប្រកួតក្នុងលីក។ តែទោះជាយ៉ាងណាយើងសូមជូនពរគាត់(Conte)ឲ្យទទួលបានជោគជ័យកាន់តែខ្លាំងក្នុងអាជីពរបស់គាត់នាថ្ងៃអនាគត។”

លោក Maurizio Sarri ដែលនឹងក្លាយជាគ្រូបង្វឹកថ្មីរបស់ Chelsea ឆាប់ៗនេះ

ប្រែសម្រួល ៖ ភក្ដី

មូលហេតុដែល Juventus បានលុបចោលនូវផែនការនៃការបង្ហាញខ្លួន Ronaldo ជាសាធារណៈត្រូវបានលាតត្រដាង

ក្រុម Juventus បានលុបចោលផែនការក្នុងការបង្ហាញខ្លួនជាសាធារណៈរបស់ខ្សែប្រយុទ្ធចំណូលថ្មី គឺកីឡាករ Cristiano Ronaldo នៅចំពោះមុខអ្នកគាំទ្ររបស់ពួកគេ។ កីឡាករដែលជាវីរបុរសរបស់ក្រុមជម្រើសជាតិព័រទុយហ្គាល់រូបនេះបានបញ្ចប់ការផ្ទេររបស់គាត់ពីក្លិបយក្សអេស្ប៉ាញ Real Madrid មកកាន់ទឹកដីរបស់ក្រុម Juventus ក្នុងតម្លៃខ្លួនផ្ទេរ ១០៥ លានអឺរ៉ូកាលពីថ្ងៃអង្គារកន្លងទៅ ប៉ុន្តែពេលនេះគាត់នឹងបង្ហាញខ្លួនជាសាធារណៈក្នុងនាមជាកីឡាកររបស់ Juventus នៅក្នុងសន្និសីទកាសែតនាថ្ងៃច័ន្ទសប្ដាហ៍ក្រោយ។

កាលពីថ្ងៃព្រហស្បតិ៍កន្លងទៅថ្មីៗ Juventus បានប្រកាសថានៅកីឡដ្ឋាន Allianz របស់ពួកគេនឹងប្រារព្ធពិធីធំមួយដោយរួមបញ្ចូលនូវការសម្ដែងភ្លើងពណ៌ ការប្រគុំតន្ត្រី និងបាញ់កាំជ្រួញផងដែរដើម្បីស្វាគមន៍ Ronaldo ម្ចាស់ពាន Ballon D’or ប្រាំសម័យកាលរូបនេះមកកាន់ទីក្រុងតូរីន។ ប៉ុន្តែផែនការរបស់គេត្រូវបានលុបចោលវិញដោយសារការហាត់ស៊ាំជួបការលំបាកច្រើន ដូច្នេះហើយអ្នកគាំទ្ររបស់ពួកគេទំនងជានឹងត្រូវបន្តការរង់ចាំយូរបន្តិចទៀតដើម្បីបានឃើញ Ronaldo ពាក់អាវ Juventus ក៏ដូចជាបង្ហាញខ្លួនជាផ្លូវការក្នុងនាមជាកីឡាកររបស់ក្រុមនៃលីកកំពូលរបស់អ៊ីតាលីមួយនេះ។ Ronaldo ត្រូវបានគេរំពឹងទុកថាគាត់នឹងចូលរួមជាមួយ Juventus សម្រាប់យុទ្ធនាការប្រកួតត្រៀមបើករដូវកាលនៅសហរដ្ឋអាមេរិក ប៉ុន្តែបុរសវ័យ ៣៣ ឆ្នាំរូបនេះទំនងជានឹងមិនចូលលេងទេ នៅពេលក្លិបថ្មីរបស់ខ្លួនប្រកួតជាមួយក្លិបចាស់ Real Madrid នាទីក្រុងវ៉ាស៊ីងតោននៅថ្ងៃទី ០៤ សីហា ២០១៨ ។

ប្រែសម្រួល ៖ ភក្ដី

Mahrez បង្ហើបឲ្យដឹងនូវមូលហេតុដែលគាត់សម្រេចចិត្តចុះចូលជាមួយ Man City

កីឡាករចំណូលថ្មីរបស់ក្រុមមេឃខៀវ Manchester City កីឡាករ Riyad Mahrez បានបង្ហើបឲ្យដឹងថាការផ្ទេររបស់ខ្លួនទៅកាន់ក្រុមម្ចាស់ជើងឯកលីកកំពូលរបស់អង់គ្លេសមួយនេះគឺដើម្បីលើកពានលីកកំពូលនៃទ្វីបអឺរ៉ុប Champions League ។ កីឡាករវ័យ ២៧ ឆ្នាំរូបនេះបានសម្រេចចាកចេញពីក្រុមកញ្ជ្រោងខៀវ Leicester City និងបញ្ចប់ការផ្ទេរចុះចូលជាមួយកីឡដ្ឋាន Etihad ជាមួយកុងត្រាដែលមានតម្លៃ ៦០ លានផោនដែលជាតម្លៃបំបែកកំណត់ត្រាក្រុម Man City ។

“Champions League គឺជាពានដែលបង្កើតឡើងសម្រាប់ក្លិបធំៗ។” Mahrez កីឡាករនៃក្រុមជម្រើសជាតិអាល់ហ្សេរីរូបនេះបាននិយាយ។ “ហើយ Man City គឺជាក្លិបធំមួយដែលមានគ្រប់យ៉ាងដើម្បីឈ្នះពានមួយនេះ។ កាលពីរដូវកាលមុនពួកគេបានបង្ហាញឲ្យឃើញនូវមហិច្ឆតាក្នុងការឡើងឲ្យបានខ្ពស់ជាងវគ្គ ៨ ក្រុមចុងក្រោយនៃការប្រកួតពាន Champions League ។ ហើយខ្ញុំបានសម្រេចចិត្តផ្លាស់មកទីនេះគឺដោយសារខ្ញុំចង់ក្លាយជាផ្នែកមួយនៅក្នុងការប្រកួតនោះ។”

ប្រែសម្រួល ៖ ភក្ដី

ក្រៅពីជួយឲ្យក្រូអាតឡើងវគ្គផ្ដាច់ព្រ័ត្រពាន World Cup ខ្សែប្រយុទ្ធ Mandzukic បានបន្សល់ទុករូបភាពដ៏អស្ចារ្យជាច្រើនសន្លឹក

ដូចដែលយើងបានដឹងហើយថាក្រុមជម្រើសជាតិក្រូអាតបានកក់កៅអីឡើងទៅកាន់វគ្គផ្ដាច់ព្រ័ត្រនៃការប្រកួតពានរង្វាន់បាល់ទាត់ពិភពលោក ២០១៨ នេះដែលវាគឺជាលើកដំបូងសម្រាប់ពួកគេ ក្រោយពីលត់ក្រុមតោកំណាចអង់គ្លេសដោយលទ្ធផល ២-១ នៅក្នុងម៉ោងបន្ថែម ១៥ នាទីពីរដង ខណៈដែលពួកគេនឹងត្រូវប៉ះគ្នាជាមួយក្រុមជម្រើសជាតិបារាំង។ ហើយខ្សែប្រយុទ្ធ Mario Mandzukic គឺជាអ្នកដែលបំប៉ើងសំណាញ់ទីរកបានគ្រាប់បាល់ជ័យជម្នះឲ្យក្រូអាត និងបានញ៉ាំងឲ្យពួកគេសម្ដែងការអបអរគ្រាប់បាល់បញ្ចូលទីនោះដោយក្ដីរំភើបរីករាយស្ទើរតែរកអ្វីមកប្រៀបផ្ទឹមពុំបាន ស្របពេលដែលទិដ្ឋភាពនៃអបអររបស់ពួកគេបានបង្កើតជាបណ្ដុំរូបភាពយ៉ាងអស្ចារ្យដែលអ្នកអាចមើលបានតាមរយៈរូបភាពប៉ុន្មានសន្លឹកខាងក្រោម ៖

ប្រែសម្រួល ៖ ភក្ដី

Barcelona បានបញ្ចប់ការចុះហត្ថលេខាទិញខ្សែការពារបារាំងមួយរូបពី Sevilla

ក្រុមអ្នកមានបុណ្យ Barcelona បានបញ្ចប់ការចុះហត្ថលេខាទិញខ្សែការពារមួយរូបពីក្រុម Sevilla គឺកីឡាករ Clement Lenglet ខណៈដែលកីឡាករវ័យ ២៣ ឆ្នាំសញ្ជាតិបារាំងរូបនេះបានធ្វើការផ្ទេរទៅកាន់កីឡដ្ឋាន Camp Nou ជាមួយនឹងកុងត្រាដែលមានតម្លៃ ៣៥.៩ លានអឺរ៉ូ និងបានចុះកុងត្រារយៈពេល ៥ ឆ្នាំជាមួយក្រុមនៃលីកកំពូលរបស់អេស្ប៉ាញមួយនេះ។

Lenglet បានចុះចូលជាមួយ Sevilla ដោយការផ្ទេរចេញពីក្រុម Nancy កាលពីខែមករា ២០១៧ និងបង្ហាញខ្លួនបានជាង ៥០ ប្រកួតឲ្យ Sevilla កាលពីរដូវកាលមុន។ ហើយគាត់មិនទាន់បានបង្ហាញខ្លួនឲ្យក្រុមជម្រើសជាតិឈុតធំរបស់បារាំងនៅឡើយ ប៉ុន្តែធ្លាប់ចូលលេងបាន ១០ ប្រកួតឲ្យជម្រើសជាតិបារាំងអាយុក្រោម ២១ ឆ្នាំ។ តម្លៃខ្លួនជាប់កុងត្រារបស់ Lenglet ជាមួយ Barcelona គឺមានតម្លៃរហូតដល់ទៅ ៣០០ លានអឺរ៉ូឯណោះ ខណៈដែលគឺជាកីឡាករទី ២ ដែលត្រូវបាន Barcelona ចុះហត្ថលេខាទិញនារដូវក្ដៅនេះ បន្ទាប់ពីការមកដល់របស់កីឡាករ Arthur កាលពីដើមសប្ដាហ៍កន្លងទៅ។

🎬 Get to know our new signing, @clement_lenglet!
⚽ #EnjoyLenglet
😃 #EnjoyBarça pic.twitter.com/9pxyvE1OTf

— FC Barcelona (@FCBarcelona) July 12, 2018

https://platform.twitter.com/widgets.js

ប្រែសម្រួល ៖ ភក្ដី

Di Maria សរសេរសារបង្ហោះលើ Instagram ដោយបង្ហើបឲ្យដឹងពីអនាគតរបស់ខ្លួនជាមួយអាហ្សង់ទីន

តាមរយៈសារដែលបានបង្ហោះចូលក្នុងទំព័របណ្ដាញសង្គម Instagram របស់ខ្លួន ខ្សែប្រយុទ្ធ Angel Di Maria ហាក់ដូចជាមានចេតនាបង្ហាញឲ្យដឹងយ៉ាងច្បាស់ថាអាជីពរបស់គាត់ជាមួយក្រុមជម្រើសជាតិអាហ្សង់ទីនគឺមិនទាន់ដើរដល់ផ្លូវបញ្ចប់នៅឡើយទេ បើទោះបីជាអាហ្សង់ទីនបានធ្លាក់ចេញពីព្រឹត្តិការណ៍នៃការប្រកួតពានរង្វាន់បាល់ទាត់ពិភពលោកឆ្នាំ ២០១៨ ត្រឹមវគ្គ ១៦ ក្រុមក្រោមថ្វីជើងរបស់ក្រុមជម្រើសជាតិបារាំងដែលបានកក់កៅអីរួចជាស្រេចឡើងទៅកាន់វគ្គផ្ដាច់ព្រ័ត្រ ក្រោយលត់ក្រុមជម្រើសជាតិប៊ែលហ្ស៊ីក ១-០ ។

ដោយសារវ័យកាន់តែចាស់បានធ្វើឲ្យកីឡាករមួយចំនួននៃក្រុមជម្រើសជាតិអាហ្សង់ទីនពិចារណារឿងចូលនិវត្តន៍ ខណៈដែលមួយចំនួនផ្សេងទៀតដូចជាខ្សែប្រយុទ្ធ Lionel Messi ជាដើមនោះគឺនៅមិនទាន់មានការសម្រេចនៅឡើយទាក់ទងនឹងការចូលនិវត្តន៍ បើទោះបីមិត្តរួមក្រុមជម្រើសជាតិរបស់គាត់មួយចំនួនបានបញ្ជាក់ឲ្យដឹងយ៉ាងច្បាស់ដូចថ្ងៃថាពួកគេមិនទាន់ព្យួរស្បែកជើងពីជម្រើសជាតិដ៏សែនកម្សត់មួយនេះទេ តួយ៉ាងដូចជាខ្សែប្រយុទ្ធ Sergio Aguero ហើយថ្មីៗនេះក៏លេចមុខ Di Maria ខ្សែប្រយុទ្ធរបស់ក្រុម Paris Saint Germain មួយរូបទៀតដែលប្រកាសថាខ្លួននឹងបន្តលេងឲ្យជម្រើសជាតិអាហ្សង់ទីន។

អតីតកីឡាកររបស់ក្រុម Real Madrid និងក្រុមបិសាចក្រហម Manchester United រូបនេះបានសរសេរនៅលើទំព័រនៃបណ្ដាញសង្គម Instagram របស់ខ្លួនយ៉ាងដូច្នេះថា ៖ “វាគឺជារឿងពិបាកមួយនៅពេលដែលលទ្ធផលចេញមកវាមិនដូចការគ្រោងទុករបស់យើង ប៉ុន្តែនេះហើយគឺជាបាល់ទាត់។ ពេលនេះអ្វីដែលសំខាន់នោះគឺក្រោកឈរឡើង និងបន្តការប្រយុទ្ធដើម្បីសម្រេចក្ដីសុបិនរបស់យើង។ តោះ! បន្តដំណើរទៅមុខទៀត អាហ្សង់ទីន…”

ប្រែសម្រួល ៖ ភក្ដី

ខ្សែការពារវ័យក្មេងមួយរូបរបស់ Real Madrid បានបញ្ចប់ការផ្ទេរទៅក្លិបអាល្លឺម៉ង់ Borussia Dortmund

ក្រុម Borussia Dortmund បានបញ្ចប់ការចុះហត្ថលេខាខ្ចីជើងខ្សែការពារ Achraf Hakimi ពីក្លិបយក្សអេស្ប៉ាញ Real Madrid ជាមួយនឹងកុងត្រារយៈពេល ២ ឆ្នាំ។ Hakimi បង្ហាញខ្លួនបាន ៩ ប្រកួតក្នុងលីកកំពូលអេស្ប៉ាញឲ្យ Real Madrid កាលពីរដូវកាលមុន និងបង្ហាញខ្លួនក្នុងការប្រកួតនៃពានរង្វាន់លីកកំពូលទ្វីបអឺរ៉ុប Champions League បានចំនួន ២ ប្រកួត ខណៈដែល Real បានលើកពានមួយនេះជាលើកទី ១៣ ក្រោយពីផ្ដួលក្រុមហង្សក្រហម Liverpool ។ ហើយកីឡាករវ័យ ១៩ ឆ្នាំសញ្ជាតិម៉ារ៉ុករូបនេះត្រូវបានគេរំពឹងថានឹងក្លាយជាគូប្រជែងជាមួយខ្សែការពារស្លាបស្ដាំរបស់ Dortmund កីឡាករ Lukasz Piszczek ។

“Hakimi គឺជាកីឡាករវ័យក្មេងមានសមត្ថភាពពេញលេញម្នាក់ដែលធ្លាប់ប្រលូកក្នុងការប្រកួតធំៗជាមួយក្លិប Real Madrid និងក្រុមជម្រើសជាតិម៉ារ៉ុក។” ប្រធានផ្នែកកីឡារបស់ Dortmund លោក Michael Zorc បាននិយាយ។ ពេលនេះ Dortmund ដែលជាក្រុមនៃលីកកំពូលរបស់អាល្លឺម៉ង់មួយនេះទិញបានកីឡាករចំណូលថ្មី ៦ រូបហើយម្រាប់រដូវកាលដោះដូរកីឡាករនារដូវក្ដៅនេះ ខណៈដែលពួកគេចង់ពង្រឹងក្លិបរបស់ខ្លួនឡើងវិញជាមួយអ្នកចាត់ការថ្មីរបស់ពួកគេគឺលោក Lucien Favre ។

ប្រែសម្រួល ៖ ភក្ដី

ក្រុមកីឡាករក្មេងៗថៃដែលបានរួចជីវិតចេញពីរូងភ្នំ មិនអាចចូលរួមទស្សនាការប្រកួតវគ្គផ្ដាច់ព្រ័ត្រពាន World Cup បានទេ ព្រោះ…

សហព័ន្ធកីឡាបាល់ទាត់អន្តរជាតិ ដែលហៅកាត់ថា FIFA បានប្រកាសថាសមាជិកនៃក្រុមបាល់ទាត់ប្រទេសថៃ Wild Boars ទាំង ១២ រូប និងរួមទាំងគ្រូបង្វឹករបស់ពួកគេមួយរូបដែរនោះនឹងមិនបានចូលរួមទស្សនាការប្រកួតវគ្គផ្ដាច់ព្រ័ត្រនៃការប្រកួតពានរង្វាន់បាល់ទាត់ពិភពលោកឆ្នាំ ២០១៨ នេះទេ ព្រោះសុខភាពរបស់ពួកគេមិនទាន់ល្អប្រសើរគ្រប់គ្រាន់ក្នុងការធ្វើដំណើរទៅកាន់ប្រទេសរុស្ស៊ីដើម្បីចូលរួមដោយផ្ទាល់នៅក្នុងព្រឹត្តិការណ៍បាល់ទាត់លំដាប់ពិភពលោកដ៏ធំមួយនេះ។

ក្រុមកីឡាករថៃដែលមានគ្នា ១២ នាក់ និងគ្រូបង្វឹករបស់ពួកគេម្នាក់ដែរនោះបានធ្វើឲ្យកក្រើកដល់ពិភពលោក បន្ទាប់ពីពួកគេបានចូលទៅលេងនៅក្នុងរូងភ្នំមួយនៅឯភាគខាងជើងនៃប្រទេសថៃ និងបានជាប់នៅក្នុងរូងនោះអស់រយៈពេល ១៧ ថ្ងៃទើបចេញមកវិញរួច ក្រោយមានការជួយយ៉ាងស្វិតស្វាញពីសំណាក់អ្នកជំនាញជាច្រើននាក់ ខណៈដែលនៅក្នុងប្រតិបត្តិការសង្គ្រោះនេះដែរបានធ្វើឲ្យបាត់បង់ជីវិតអតីតកងទ័ពជើងទឹកថៃម្នាក់។

ហើយនៅពេលដែលគេបានរកឃើញក្រុមកីឡាករក្មេងៗទាំងនោះនៅក្នុងរូងភ្នំ និងដឹងថាពួកគេនៅមានជីវិត ពេលនោះក៏មានសេចក្ដីរាយការណ៍មកថាពួកគេនឹងត្រូវបានអញ្ជើញឲ្យចូលរួមទស្សនាដោយផ្ទាល់នូវការប្រកួតវគ្គផ្ដាច់ព្រ័ត្រពាន World Cup ដែលនឹងត្រូវបានធ្វើឡើងនៅថ្ងៃអាទិត្យ ១៥ កក្កដា ខាងមុខនាទីក្រុងមូស្កូ ប្រទេសរុស្ស៊ី។ តែទោះជាយ៉ាងណា បន្ទាប់ពីពួកគេទាំង ១៣ នាក់នោះត្រូវបានជួយសង្គ្រោះចេញពីរូងភ្នំបានដោយសុវត្ថភាព ស្រាប់តែ FIFA ប្រកាសថាពួកគេនឹងជួបជាមួយសហព័ន្ធកីឡាបាល់ទាត់របស់ថៃ ប៉ុន្តែចំណែកក្រុមកីឡាករក្មេងៗទាំង ១២ រូប និងគ្រូបង្វឹករបស់ពួកគេនឹងមិនអាចធ្វើដំណើរទៅចូលរួមទស្សនាការប្រកួតពាន World Cup វគ្គផ្ដាច់ព្រ័ត្របានទេ ក្រោមហេតុផលបញ្ហាសុខភាព។ “FIFA ចង់បង្ហាញនូវសេចក្តីរីករាយយ៉ាងខ្លាំងចំពោះព័ត៌មាននៃការជួយសង្គ្រោះកីឡាករបាល់ទាត់វ័យក្មេងចំនួន ១២ នាក់ និងគ្រូបង្វឹករបស់ពួកគេ។” សេចក្ដីថ្លែងការណ៍មួយរបស់ FIFA បានសរសេរ។ “យើងសូមថ្លែងអំណរគុណយ៉ាងជ្រាលជ្រៅចំពោះអ្នកទាំងអស់ដែលចូលរួមក្នុងប្រតិបត្តិការជួយសង្គ្រោះដែលជាអកុសលបានឆក់យកជីវិតអ្នកមុជទឹកម្នាក់។ ហើយយើងត្រូវបានប្រកាសឲ្យដឹងជាមុនដោយសហព័ន្ធកីឡាបាល់ទាត់របស់ថៃថាដោយសារបញ្ហាសុខភាព ដូច្នេះក្រុមកីឡាករក្មេងៗទាំងនោះនឹងមិនអាចធ្វើដំណើរទៅកាន់ទីក្រុងមូស្កូដើម្បីចូលរួមទស្សនាការប្រកួតពាន World Cup វគ្គផ្ដាច់ព្រ័ត្របានទេ។ ប៉ុន្តែយើងនឹងស្វែងរកឱកាសផ្សេងទៀតដើម្បីអញ្ជើញពួកគេចូលរួមក្នុងព្រឹត្តិការណ៍របស់ FIFA ។ យើងក៏នឹងមានជំនួបមួយជាមួយសហព័ន្ធបាល់ទាត់ថៃនៅថ្ងៃប្រកួតផ្ដាច់ព្រ័ត្រនោះផងដែរ។”

ប្រែសម្រួល ៖ ភក្ដី

Ronaldo បង្ហើបឲ្យដឹងពីមូលហេតុដែលគាត់សម្រេចចាកចេញពី Real Madrid ទៅចុះចូល Juventus

ខ្សែប្រយុទ្ធ Cristiano Ronaldo បានសរសេរសារមួយច្បាស់ទៅកាន់អ្នកគាំទ្ររបស់ក្រុមយក្សអេស្ប៉ាញ Real Madrid ដើម្បីពន្យល់ឲ្យដឹងពីមូលហេតុនៃការសម្រេចចិត្តរបស់គាត់ទៅចុះចូលជាមួយក្រុម Juventus ។ តារាបាល់ទាត់ឆ្នើមនៃក្រុមជម្រើសជាតិព័រទុយហ្គាល់រូបនេះបានធ្វើឲ្យកក្រើកពិភពបាល់ទាត់តាមរយៈការចាកចេញពីកីឡដ្ឋាន Bernabeu ទៅចុះកុងត្រា ៤ ឆ្នាំជាមួយក្លិបយក្សរបស់អ៊ីតាលីក្នុងតម្លៃខ្លួនផ្ទេរ ១០៥ លានអឺរ៉ូ ខណៈដែលកីឡាករវ័យ ៣៣ ឆ្នាំរូបនេះត្រូវបានគេរំពឹងថានឹងរកចំណូលបានខ្ទង់ ៥០ ម៉ឺនផោនក្នុងសប្ដាហ៍ជាមួយក្លិបថ្មីរបស់គាត់។

ហើយនេះគឺជាសាររៀបរាប់របស់អតីតកីឡាករនៃក្រុមបិសាចក្រហម Manchester United រូបនេះដែលត្រូវបានបង្ហោះនៅលើគេហទំព័រផ្លូវការរបស់ Real Madrid នៅថ្ងៃដែលក្រុមម្ចាស់ជើងឯកពាន Champions League និងម្ចាស់ជើងឯកលីកកំពូលអេស្ប៉ាញមួយនេះប្រកាសចែកផ្លូវគ្នាជាមួយ Ronaldo ដែលបានរួមរស់ជាមួយក្លិបពួកគេ ៩ ឆ្នាំ ៖ “នាប៉ុន្មានឆ្នាំកន្លងមកនេះនៅ Real Madrid ក៏ដូចជានៅក្នុងទីក្រុងម៉ាទ្រីតប្រហែលវាជាពេលវេលាដ៏មានសុភមង្គលបំផុតក្នុងជីវិតរបស់ខ្ញុំ។ ខ្ញុំមានតែការដឹងគុណយ៉ាងធំធាងចំពោះក្លិប និងទីក្រុងមួយនេះ និងអរគុណអ្នកទាំងអស់គ្នាសម្រាប់ការស្រលាញ់។ ខ្ញុំជឿថាពេលវេលាក្នុងបើកទំព័រជីវិតថ្មីរបស់ខ្ញុំគឺវាត្រូវតែមកដល់ ហើយនោះឯងគឺមូលហេតុដែលខ្ញុំបានសុំការអនុញ្ញាតចាកចេញពីក្លិប។ ខ្ញុំមានអារម្មណ៍បែបនោះ និងចង់សុំឲ្យអ្នករាល់គ្នា ជាពិសេសអ្នកគាំទ្រខ្ញុំសូមយល់ពីមូលហេតុមួយនេះ។”

ប្រែសម្រួល ៖ ភក្ដី