រាជធានីភ្នំពេញ ៖ អាជ្ញាធររាជធានីបានអះអាងថា រហូតមកដល់ពេលនេះ ការងារជួសជុល និងកែលម្អស្ពានជ្រោយចង្វារចាស់ បានដំណើរការដល់ដំណាក់កាលគល់ស្ពានផ្នែកខាងលិច ដែលចាំបាច់ត្រូវធ្វើការបិទកំណាត់ផ្លូវជាតិលេខ៥ ត្រង់ចំណុចគល់ស្ពាន និងតម្រូវឲ្យធ្វើចរាចរឯកទិសនៅក្បែរការរដ្ឋាននោះជាបណ្ដោះអាសន្នសិន ។
យោងតាមសេចក្ដីជូនដំណឹងរបស់រដ្ឋបាលរាជធានីភ្នំពេញ ចុះថ្ងៃទី១៩ ខែមករា ឆ្នាំ២០១៨ នេះ បានឲ្យដឹងថា គម្រោងជួសជុល និងស្ដារឡើងវិញ នៃស្ពានមិត្ដភាព-ជប៉ុន ឈានដល់ដំណាក់កាលដែលតម្រូវឲ្យបិទកំណាត់ផ្លូវជាតិលេខ៥ ចំណុចខាងក្រោមស្ពាន ជាបណ្ដោះអាសន្ន ។
សេចក្ដីជូនដំណឹងដដែលនោះ បានបញ្ជាក់ថា ដើម្បីឲ្យការអនុវត្ដការងារជួសជុលស្ពានមិត្ដភាព កម្ពុជា-ជប៉ុន បានទាន់ពេលវេលា រដ្ឋបាលរាជធានីភ្នំពេញ សូមជូនដំណឹងដល់បងប្អូនប្រជាពលរដ្ឋទាំងអស់ ដែលធ្វើដំណើរឆ្លងកាត់ផ្លូវជាតិលេខ៥ ចំណុចក្រោមស្ពានមិត្ដភាពកម្ពុជា-ជប៉ុន សូមបង្វែរមកប្រើប្រាស់ផ្លូវវាង (ផ្លូវឯកទិស) ជាបណ្ដោះអាសន្ននៅក្បែរការដ្ឋានស្ពានជ្រោយចង្វារ ចាប់ពីខែមករា ឆ្នាំ២០១៨ នេះតទៅ រហូតដល់មានការជូនដំណឹងអំពីការបើកឲ្យប្រើប្រាស់ជាធម្មតាឡើងវិញ ។
មន្ត្រីរដ្ឋបាលរាជធានីភ្នំពេញ បានឲ្យដឹងថា ស្ពានជ្រោយចង្វារមិត្តភាព កម្ពុជា-ជប៉ុន បើកដំណើរការជួសជុលកែលម្អជាផ្លូវការនៅថ្ងៃទី១៥ ខែកញ្ញា ឆ្នាំ២០១៧ មានរយៈពេល២ឆ្នាំ ដែលគ្រោងចំណាយថវិការហូតដល់ជាង៣៣លានដុល្លារ ដែលជាជំនួយឥតសំណងរបស់រដ្ឋាភិបាលជប៉ុន ។
គម្រោងជួសជុលស្ពានជ្រោយចង្វារចាស់នេះ នឹងត្រូវធ្វើឡើងតាមរូបភាពស្ថាបនាថ្មីនៅគល់ស្ពានទាំងសងខាងដែលមានលក្ខណៈចាស់ទ្រុឌទ្រោមខ្លាំង ប៉ុន្តែសម្រាប់ផ្នែកកណ្តាលស្ពានគ្រាន់តែធ្វើការជួសជុល ឡើងវិញតិចតួចប៉ុណ្ណោះ ដោយសារបង្គំដែកសម្រាប់ភ្ជាប់ស្ពាននៅមានភាពល្អ ។
គួររំឭកថា គម្រោងជួសជុលកែលម្អស្ពានជ្រោយចង្វានេះ ប្រើរយៈពេលជាង២២ខែ ឬ២ឆ្នាំ ដែលចំណាយថវិការប្រមាណជាង៣៣លានដុល្លារ ជាជំនួយឥតសំណងរបស់រដ្ឋាភិបាលជប៉ុន ។ ស្ពាននេះមានបណ្ដោយ៧០៩ម៉ែត្រ កសាងឡើងនៅសម័យសង្គមរាស្ត្រនិយម ក្នុងឆ្នាំ១៩៦៦ ក្រោយមកត្រូវបានកាត់ផ្តាច់នៅឆ្នាំ១៩៧២ ដោយសារការដាក់បង្កៃគ្រាប់មីននៅក្នុងរថយន្ត បន្ទាប់មកទៀតបានជួសជុលឡើងវិញ និងសម្ពោធដាក់ឲ្យប្រើសប្រាស់នៅថ្ងៃទី២៦ ខែកុម្ភៈ ឆ្នាំ១៩៩៤ ក្រោមជំនួយឥតសំណងរបស់រាជរដ្ឋាភិបាលជប៉ុន រហួតមកដល់ពេលនេះ ៕
Site Title 