(ភ្នំពេញ) នៅព្រឹកថ្ងៃទី១៤ខែកញ្ញានេះ ក្រសួងអប់រំយុវជននិងកីឡា បានចាប់ផ្តើមប្រកាសលទ្ធផលថ្មី ជាលើកទី២ សម្រាប់ថ្នាក់វិទ្យាសាស្ត្រនៃការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា សម័យប្រឡង៖ ២០ សីហា ២០១៨
សូមបញ្ជាក់ថា៖ ក្រសួងប្រកាសផ្សាយតែបញ្ជីរាយនាម បេក្ខជនសម្រាប់ថ្នាក់វិទ្យាសាស្ត្រ ដែលជាប់តែប៉ុណ្ណោះ។ សម្រាប់ថ្នាក់វិទ្យាសាស្ត្រសង្គម មិនមានការប៉ះពាល់ទេ។
គណៈគម្មការកោលវិសល្បវិច័យ បានរកឃើញថា ដំណើការបូកស្រង់ពិន្ទុតាមប្រព័ន្ធកុំព្យូទ័រ មានបញ្ហាបច្ចេកទេសដែលបានប៉ះពាល់ដល់ពិន្ទុវិញ្ញាសាគណិតវិទ្យារបស់ថ្នាក់វិទ្យាសាស្រ្ត ក្នុងមណ្ឌលមួយចំនួន ដោយសារកម្មវិធីកុំព្យូទ័រ មិនបានបូកស្រង់ពិន្ទុមុខវិជ្ជាគណិតវិទ្យារបស់បេក្ខជនចំនួន ៧៤០ បន្ទប់។ បន្ទាប់ពីដោះស្រាយបញ្ហាបច្ចេកទេសរួច លទ្ធផលនៃការប្រឡងមានដូចតទៅ ៖ បេក្ខជនជាប់សរុប ៧៦.០៣៤នាក់ ត្រូវជា ៦៧,០៧ភាគរយ។ បេក្ខជនជាប់និទ្ទេស A មានចំនួន ៤០៨នាក់ និទ្ទេស B ចំនួន២.២២២នាក់ និទ្ទេស C ចំនួន ៦.០៥១នាក់ និទ្ទេស D ចំនួន ១៥.១៨០នាក់ និងនិទ្ទេសE ចំនួន៥២.១៨៣នាក់។ ក្រសួងអប់រំ នឹងចេញលទ្ធផលប្រឡងថ្មី សម្រាប់ថ្នាក់វិទ្យាសាស្រ្ត នៅថ្ងៃទី១៤ ខែកញ្ញា ឆ្នាំ២០១៨ លើទំព័រហ្វេសប៊ុកនៃក្រសួង និងនៅថ្ងៃទី១៥ ខែកញ្ញាឆ្នាំ២០១៨ នៅតាមមន្ទីរអប់រំយុវជននិងកីឡា។
ជាមួយករណីកំហុសបច្ចេកទេសលើលទ្ធផលប្រឡងរបស់បេក្ខជននេះ បណ្តាញសង្គមហ្វេសប៊ុក បានសរសេររថា ក្រសួងអប់រំ យុវជន និង កីឡា រកឃើញជនប្រព្រឹត្តកំហុស ក្នុងការកែវិញ្ញាសាបេក្ខជនប្រឡងបាក់ឌុបឃើញហើយ ។ ឆ្លើយដាក់តែលើ Computer និង កំហុសបច្ចេកទេសទៅ មន្ត្រីអប់រំរួចខ្លួនទាំងអស់ ។ ជនបង្ក ដែលត្រូវបានវែកមុខរកឃើញនាពេលគឺកុំព្យូទ័រ ដែលធ្វើឲ្យការប្រឡងមានការតវ៉ា ដូច្នេះសូមសមត្ថកិច្ចត្រូវតែមានវិធានការជាបន្ទាន់ ចាប់កុំព្យូទ័រដាក់គុក។
បណ្តាញទំនាក់ទំនងសង្គមហ្វេសប៊ុក បានសរសេរថា មានសិស្សស្រីម្នាក់ ធ្លាក់សម្លាប់ខ្លួនរួចទៅហើយ ហើយមានឈ្មោះជាប់វិញនៅថ្ងៃនេះ តើអ្នកណាទទួលខុសត្រូវ ? ចំណែក ឈ្មោះ Hun Som Rith SP បានសរសេរថា បានត្រឹមតែសោកស្តាយ តែជីវិតមនុស្សមិនអាចយកអ្វីមកទិញបាន បើសិនលទ្ធផល ក្មេងស្រីដែលសម្លាប់ខ្លួន ដោយសារប្រឡងធ្លាក់ បែរជាជាប់វិញ មន្ត្រីដែលពាក់ព័ន្ធ គួរតែសុំលាឈប់ពីក្រសួង ឬនាយកដ្ឋានឲ្យអស់ទៅ។ ឈ្មោះ Ly Bunna បានបញ្ចេញមតិថា នេះដោយសារមានសិស្សធ្វើការតវ៉ា បើគ្មានទេរឿងទាំងនេះ ត្រូវកប់បាត់ ហើយបេក្ខជនត្រូវរៀនត្រួតថ្នាក់មួយឆ្នាំទៀត ដោយឥតប្រយោជន៍ ម៉្យាងទៀតការប្រឡងឆ្នាំកន្លងទៅ មិនដឹងយ៉ាងម៉េច បើឆ្នាំនេះ ទើបតែបែកធ្លាយថ្មីៗ ។ វិន័យតឹងរ៉ឺងណាស់ចំពោះបេក្ខជនប្រឡង បើមានកំហុសក្រសួង ឱ្យធ្លាក់ដោយស្វ័យប្រវតិ្ត ចុះកំហុសរបស់ក្រសួងធំប៉ុនមេឃ តើអ្នកណាទទួលខុសត្រូវ?។ ចឹងសុំឱ្យក្រសួងមើលឃើញ កំហុសខ្លួនឯងខ្លះផង កុំឃើញតែកំហុសអ្នកដទៃ។ គណនីហ្វេសប៊ុក Bunnarith Kuch បានសរសេរថា រដ្ឋមន្រ្តីអប់រំ គាត់ខិតខំបានល្អ កន្លងមក តែដើម្បីជាគំរូ នូវកង្វះការត្រួតពិនិត្យនេះ លោកនិងមន្រ្តីមួយចំនួនទៀត ត្រូវតែលាលែងពីតំណែង ជាគំរូដល់ស្ថាប័នផ្សេងទៀតផង។ តើហ៊ានទេ?។
ចំណែក បេក្ខជន ឆាយ លីអាន បានធ្លាក់មុខវិជ្ជាគណិត ក្នុងការប្រកាសលទ្ធផលលើកទី១ បានរៀបរាប់ទាំងអារម្មណ៍រំភើបថា ខ្លួនកំពុងត្រៀមប្រឡងចូលរៀននៅវិទ្យាស្ថានបច្ចេកវិទ្យាកម្ពុជា (តិចណូ) លើមុខជំនាញវិស្វកម្ម។ គោលដៅបន្ទាប់ទៀតប្រសិនបើមានការជ្រើសរើសនិស្សិតអាហារូបករណ៍ ទៅបរទេស លីអាន គ្រោងទៅបន្តការសិក្សានៅប្រទេសជប៉ុន ឬប្រទេសចិន។ លទ្ធផលលើកទី១ និងពេលនេះ លីអាន ប្រាប់ថា ខុសគ្នាដូចមេឃ និងដី។ លើកទី១ លីអាន បាក់ទឹកចិត្តយ៉ាងខ្លាំង អស់សង្ឃឹម តែពេលនេះខ្លួនរីករាយនឹងលទ្ធផលដែលក្រសួងកែប្រែថ្មីនេះ។ មុនការស៊ើរើនេះ បេក្ខជនដែលធ្លាប់ជាប់លេខ២ ក្នុងការសិស្សពូកែគណិតឆ្នាំ២០១៥ និងលេខ១ឆ្នាំ២០១៨រូបនេះ បានទទួលត្រឹមនិទ្ទេសD ប៉ុណ្ណោះ។
គណនីហ្វេសប៊ុក Doung David បានបញ្ចេញថា ធ្វើអ៊ីចឹង ទើបវាយុត្តិធម៌សម្រាប់គ្នា។ គ្នាយំឡើងអស់ទឹកភ្នែក ចង់ពាក់កណ្ដាលទន្លេមេគង្គហើយ។ យ៉ាងណាក៏អរគុណដល់លោកគ្រូ អ្នកគ្រូ ដែលធ្វើការនៅក្នុងក្រសួងអប់រំទាំងអស់ ដែលបានព្យាយាមដោះស្រាយបញ្ហា ជូនប្អូនៗសិស្សានុសិស្សបានយ៉ាងលឿន។
ចំណែកផេកហ្វេសប៊ុកឈ្មោះ IMan-KH បានបញ្ចេញនូវសាររបស់ខ្លួនថា ធ្វើការងារដូចអាចម៍ភេ
ធ្វើការងារគ្មានទំនួលខុសត្រូវ ហើយតាំងមកទម្លាក់កំហុស ដាក់បន្ទុកឲ្យកុំព្យូទ័រ ដែលជាម៉ាស៊ីនមិនចេះនិយាយបកស្រាយ។ ធាតុពិត គឺកំហុសរបស់មនុស្ស ប៉ុន្តែ ដើម្បីលើកមុខលើកមាត់ មនុស្ស ទើបទម្លាក់រឿងនេះ ឲ្យម៉ាស៊ីនកុំព្យូទ័រទទួលខុស ហើយក្រុមបក្ខខ្លួនឯងរួចខ្លួន។ នេះបើសិនជាគ្មានការតវ៉ា ម្ល៉េះអនាគត សិស្សខំរៀនរាប់ពាន់នាក់ ត្រូវបានបំផ្លាញដោយសារទឹកប៊ិច របស់មន្ត្រីក្រសួងអប់រំ ដែលធ្វើការខ្ជីរខ្ជារ។ ធម្មតាម៉ាស៊ីនកុំព្យូទ័រ វាត្រូវតែដំណើរការ ជាមួយមនុស្ស ក្រោមការត្រួតពិនិត្យ និងបញ្ជាដោយមនុស្ស ហេតុនេះ មុននឹងសម្រេចលទ្ធផល បែបណា គឺមនុស្សជាអ្នកផ្ទៀងផ្ទាត់ និងចុះហត្ថលេខា លើកិច្ចការដែលកុំព្យូទ័រ បញ្ចេញលទ្ធផលមកក្រៅ។
កុំព្យូទ័រក៏ត្រូវការឲ្យមនុស្សពិនិត្យ និង កែប្រែកំហុស របស់វាផងដែរ បើក្រសួងធ្វើការពឹងលើកុំព្យូទ័រ តើចាំបាច់មានអស់លោកឯងនេះ បើកប្រាក់ខែធ្វើអ្វី? ម្តេចមិនបើកប្រាក់ខែឲ្យកុំព្យូទ័រ?។
ចំណែក ឈ្មោះ Yim Sinorn បានលើកឡើងថា បើនិយាយពីទំនួសខុសត្រូវវិញ រដ្ឋមន្រ្តីអប់រំ ត្រូវធ្វើការសុំទោសជាសាធារណៈ និងត្រូវលាលែងពីតំណែង។
ផេកហ្វេសប៊ុក មរតក ជាតិ បានលើកឡើងថា ជនដែលធ្វើឱ្យមានការកំហុសដ៏ធ្ងន់ធ្ងរ នៃការបូកសរុបលទ្ធផលការប្រឡងបាក់ឌុប ត្រូវបានចាប់ខ្លួនហើយ….!!! អាងតែគ្នាមិនចេះនិយាយ ដាក់កំហុសលើគ្នារហូត តែមិនដឹងធ្វើម៉េចទេ នេះកម្មរបស់ឯង…!!! ចំណែកមន្ត្រីក្រសួង ដែលកាន់ការផ្នែកនេះ ទំនងជាមិនមានវាសនាដូច Computerនេះឡើយ…!!!។
ផេក okmean Alexandra បានបញ្ចេញនូវសាររបស់ខ្លួនថា នរណាៗក៏និយាយពីរឿងនេះដែរ គេ (បេក្ខជន ឆាយ លីអាន ) តួឯកនៃប្រធានបទ “លទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ ២០១៨” ។ គេជាមេទ័ពដឹកនាំនាវាអប់រំកម្ពុជា ទៅកាន់ត្រើយយុត្តិធម៌ គេជាយុវជនទេវតា កែប្រែវាសនាពីនិទ្ទេស D មក A ។ គេជាវាគ្មិនការទូតដ៏ពូកែ ពាំនាំពាក្យទៅកាន់ពិភពសារព័ត៌មាន ដោយជោគជ័យ ។ គេជានិមិត្តរូបនៃភាពជឿជាក់លើសមត្ថភាពបុគ្គល។
Sovann Heng បានសរសេរថា និយាយរួម ខុសមកពីអាកុំព្យូទ័រហ្នឹង! វាអត់ដឹងថា គេលោតទឹក ចងករដោយសារវាសោះ… អានេះវ៉ី!!! ។ តាមចិត្តខឹង ចង់តែដោះ Hard Disk យកទៅហាលថ្ងៃ ។ កាច់ Ram បំពងខ្លាញ់។ ដក CUP លាយសាច់ចិញ្ច្រាំឆាជាមួយមី។ ហើយអា Main Bord វិញត្រាំទឹកទុកឱ្យបាន២ខែ ចាំស្រង់មកវិញប្រឡាក់គ្រឿងអាំងស៊ីឱ្យអស់! កុំឱ្យវាខូចពេក
Site Title 