(កីឡា) ៣ក្រុមលើកំពូលតារាងនៃព្រឹត្តិការណ៍កីឡាបាល់ទាត់ពាន រង្វាន់ពាក់កណ្ដាលអាជីព Khmer Real Estate League លើកទី៧ រដូវកាល ២០១៨ គឺក្រុម Avatar, Khemr United និងក្រុម   Bayon Wanderers ដែលកំពុងឈ្នះ និងចាញ់តែ១ពិន្ទុគ្នា ត្រឹមតែ១ពិន្ទុនោះ នឹងត្រូវប្រើ ប្រាស់១ប្រកួតដ៏សំខាន់ចុងក្រោយ នាចុងសប្តាហ៍នេះ ក្នុងការប្រជែងឈ្នះម្ចាស់តំណែង​ជើងឯក។

ក្រុមទាំង៣នឹងត្រូវប្រឹងប្រែងអស់ពីលទ្ធភាពដូចៗគ្នា ដើម្បីរក្សាខ្លួន និងប្រជែងរកពិន្ទុបន្ថែម នៅ១ប្រកួត ចុងក្រោយ ដើម្បីឈ្នះពានរង្វាន់ម្ចាស់តំណែងជើងឯក នាចុងសប្តាហ៍នេះ។ សម្រាប់មួយប្រកួតចុងក្រោយរបស់ក្រុមទាំង៣ គឺក្រុម Avatar នឹងត្រូវប្រជែងជាមួយក្រុម​យុវជន កំពង់ចាម ខណៈ Khmer United នឹងប៉ះជាមួយក្រុម កូនខ្មែរ និង Bayon Wanderers ត្រូវជួបក្រុម Mambo PP។

ក្រុម Avatar FC ដែលកំពុងមានប្រៀប១ពិន្ទុ លើក្រុម Khemr United និងក្រុម Bayon Wanderers បាន បញ្ចប់១៨ប្រកួតដោយមាន៤៧ពិន្ទុ ឈ្នះ១៥ប្រកួត ស្មើ២ប្រកួត និងចាញ់១ ប្រកួត ឈរនៅចំណាត់ថ្នាក់លេខ១ បណ្តោះអាសន្ន ខណៈ១៨ប្រកួតរបស់ក្រុម Khemr United មាន៤៦ពិន្ទុ ឈ្នះ១៤ប្រកួត ស្មើ៤ប្រកួត ឈរនៅ ចំណាត់ថ្នាក់លេខ២ និង១៨ ប្រកួតរបស់ Bayon Wanderers បានបញ្ចប់ជាមួយនឹងចំណាត់ថ្នាក់លេខ៣ បណ្តោះអាសន្ន ដោយឈ្នះ១៥ប្រកួត ស្មើ១ប្រកួត និងចាញ់២ប្រកួត ដោយមាន៤៦ពិន្ទុដែរដោយចាញ់គ្រាប់ បាល់។

ចំពោះលទ្ធផលសប្តាហ៍ទី១៨របស់ក្រុមទាំង៣នេះ គឺក្រុម Avatar និង Khemr United ចែកគ្នា ម្នាក់១ពិន្ទុ បន្ទាប់ពីរក្សាលទ្ធផលស្មើគ្នា ២ទល់២ ខណៈក្រុម Bayon Wanderersរកបាន៣ ពិន្ទុបន្ថែមពីក្រុម Riel PP ដោយលទ្ធផល ៣ទល់០។

សូមបញ្ជាក់ថា លទ្ធផលនាសប្ដាហ៍ទី១៨នេះដែរ ដែលមាន៧ប្រកួតផ្សេងទៀតនោះ រួមមាន៖ យុវជន ខេត្តកំពង់ចាម បំបាក់ក្រុម Giant ១៩-២, ក្រុម Blue Dragonយកឈ្នះក្រុមបាសាក់ ៣-២, ក្រុម Mambo PP យកឈ្នះ ក្រុមទន្សោងFC ២-០, ក្រុមយុវជនច្បាប់យកឈ្នះក្រុមវត្តកោះ ៣-០, ក្រុមយុវជនស្នោរយកឈ្នះក្រុម Anvaya ៣-០, ក្រុមតាំងគោក ឈ្នះក្រុមអាណា ចក្រទួលគោក ៣-០, ក្រុម HHK ឈ្នះក្រុមកូនខ្មែរ ៨-៣ ស្របពេលដែល ក្រុម V.Trian ប្រកួត ចាញ់ ក្រុម RFL នៅក្នុងលទ្ធផល ០ទល់៣៕ប្រភពAKP

(កីឡា) ដោយមើលឃើញពីសមិទ្ធិផលដ៏ល្អប្រសើរទាំងលីគកំពូលកម្ពុជា និងពានរង្វាន់សម្ដេចតេជោ ហ៊ុន សែន-Hun Sen Cup លើកទី១២ នាប៉ុន្មានប្រកួតចុងក្រោយ ថ្នាក់ដឹកនាំក្រុមអង្គរថាយហ្គឺរ បានដាក់ការជឿជាក់ជាខ្លាំងលើគ្រូបង្វឹកលោក Oriol Mohedano និងកីឡាករទាំងអស់ សម្រាប់ជំនួបវគ្គពាក់កណ្ដាលផ្ដាច់ព្រ័ត្រពានសម្ដេចតេជោ ហ៊ុន សែន ជាមួយក្រុមអគ្គស្នងការដ្ឋាននគរបាលជាតិ នាថ្ងៃទី០២ ខែកញ្ញាចុងសប្ដាហ៍នេះ ។ នេះបើតាមការបញ្ជាក់របស់ កញ្ញា សុខ មួយ អគ្គលេខាធិការក្លឹបបាល់ទាត់អង្គរថាយហ្គឺរ ។

អគ្គលេខាធិការក្លឹបស្រីវ័យក្មេងរូបនេះ បានបញ្ជាក់ក្រោយរកឃើញគូប្រកួតវគ្គ ១/២ ថា៖ «ខ្ញុំទុកចិត្ត និងជឿជាក់ ១០០% សម្រាប់គ្រូបង្វឹករបស់យើង ក្នុងការដឹកនាំ ដោយសារប៉ុន្មានប្រកួតចុងក្រោយ ទាំងកីឡាករ និងគ្រូបង្វឹក សុទ្ធតែស៊ីចង្វាក់គ្នា ពួកគាត់ធ្វើបានល្អ ។ អុីចឹងថ្នាក់ដឹកនាំ គាត់មានការទុកចិត្តខ្ពស់បំផុត ទៅលើពួកគាត់ ហើយសង្ឃឹមថា ពួកគាត់នឹងធ្វើបានល្អ ដើម្បីទទួលបានជ័យជម្នះក្នុងជំនួបជាមួយក្រុមប៉ូលិស» ។ តែយ៉ាងណាកញ្ញា បានអះអាងថា នឹងមិនធ្វេសប្រហែស ឬមើលងាយគូប្រកួតឡើយ ព្រោះប៉ូលិស ក៏ធ្លាប់លើកពាននេះដែរ ។

គួរបញ្ជាក់ថា សម្រាប់ការប្រកួតវគ្គពាក់កណ្ដាលផ្ដាច់ព្រ័ត្រពានរង្វាន់សម្ដេចតេជោ ហ៊ុន សែន លើកទី១២ នឹងធ្វើឡើងតែ ១ជើងប៉ុណ្ណោះ ដោយប្រើប្រាស់ទឹកដីកណ្ដាល គឺពហុកីឡដ្ឋានជាតិ ដើម្បីប្រកួតកាត់សេចក្ដីរកក្រុមឈ្នះឡើងវគ្គផ្ដាច់ព្រ័ត្រ តែក្រុមចាញ់នឹងទទួលបានលេខ៣ ដោយស្វ័យប្រវត្តិ មិនបាច់ប្រកួតនោះទេ ។

រីឯកម្មវិធីប្រកួត គឺក្រុមក្រសួងការពារជាតិ ត្រូវជួបក្រុមណាហ្គាវើល នៅថ្ងៃទី០១ កញ្ញា និងក្រុមអង្គរថាយហ្គឺរ ជួបក្រុមអគ្គស្នងការដ្ឋាននគរបាលជាតិ នៅថ្ងៃទី០២ កញ្ញា ឆ្នាំ២០១៨ ។ ចាំមើលតើក្រុមណាខ្លះ នឹងក្លាយជាបេក្ខភាពប្រកួតវគ្គផ្ដាច់ព្រ័ត្រពានប្រើប្រាស់កីឡាករក្នុងស្រុកសុទ្ធមួយនេះ ៕ ប្រភពCAMSPORT

(អន្តរជាតិ) អ្នកនាំពាក្យវិមានក្រឹមឡាំង លោក ឌ្មីទ្រី ប៉េស្កូវ បាននិយាយពីថ្ងៃអង្គារថា ការប្រកាសរបស់ ប្រទេសចិនដែលថា ខ្លួននឹងចូលរួមនៅក្នុងសមយុទ្ធយោធា Vostok-2018 ( East- 2018 ) របស់ប្រទេសរុស្ស៊ីនោះនឹងបង្ហាញឱ្យឃើញពីការពង្រីកកិច្ចសហប្រតិបត្តិការរបស់ប្រទេសទាំងពីរ ក្នុងក្រុមវិស័យទាំងអស់ ។

Vostok-2018 ដែលត្រូវធ្វើចាប់ពីថ្ងៃទី១១ ដល់ ១៥ ខែកញ្ញានឹងចូលរួមដោយកងទ័ពជិត ៣០០.០០០ នាក់ , រថយន្តយោធាប្រហែល៣៦.០០០ គ្រឿងនឹងយន្តហោះជាង ១.០០០ គ្រឿង មកពីសង្កាត់យោធា ភាគខាងកើត និងកណ្តាលរបស់រុស្ស៊ី ព្រមទាំងកងនាវាភាគខាងជើង ។

ក្រសួងការពារប្រទេសចិនបានប្រកាសកាលពីសប្តាហ៍កន្លងទៅថា ចិននឹងបញ្ជូនកងទ័ពប្រហែល ៣.២០០នាក់ ព្រមជាមួយគ្រឿងសព្វាវុធជាង៩០០ គ្រឿង ហើយនឹងយន្តហោះមានកង្ហាល់និង ឧទ្ធម្ភាគ ចក្រ៣០គ្រឿងទៅចូលរួមនៅក្នុងការវាយប្រហារបាញ់គ្រាប់ពិត ព្រមទាំងការហ្វឹកហាត់ប្រឆាំងនឹងការវាយ ប្រហារ ។

កងយោធារបស់ប្រទេសទាំងពីរ នឹងធ្វើសមយុទ្ធរួមនៅឯកន្លែងហ្វឹកហាត់ Tsugol ក្នុងតំបន់ Trans-Baikal របស់ប្រទេសរុស្ស៊ី ចាប់ពីថ្ងៃទី១១ ដល់ ១៥ ខែកញ្ញា ខាងមុខ នេះ ៕ប្រភពAKP

(អន្តរជាតិ) រដ្ឋមន្ត្រីការពារប្រទេសអាមេរិក លោក ជេម ម៉ាតទីស (James Mattis ) បាននិយាយពីថ្ងៃអង្គារថា ស.រ.អា គ្មានផែនការណាមួយដើម្បីផ្អាកការធ្វើសមយុទ្ធយោធាថែមទៀតណាមួយ ជាមួយកូរ៉េខាងត្បូងនោះទេ ។

នៅក្នុងសន្និសីទសារព័ត៌មានមួយលោក ម៉ាតទីស បាននិយាយថា ​យើងប្រកាន់យកនូវជំហាន ដើម្បីផ្អាកសមយុទ្ធដ៏ធំបំផុតជាច្រើនធ្វើជាវិធានការសុឆន្ទៈមួយ ដែលកើតចេញមកពីកិច្ចប្រជុំកំពូលនៅ សិង្ហបុរី ។

លោកបាននិយាយថា នៅពេលនេះយើងគ្មានផែនការណាមួយ ដើម្បីផ្អាកការធ្វើសមយុទ្ធថែមទៀតណាមួយទេ ដោយលោកនិយាយបន្ថែមថា គ្មានការសម្រេចចិត្តណាមួយនៅឡើយទេ ស្តីពីការធ្វើសមយុទ្ធយ៉ាងសំខាន់សម្រាប់ឆ្នាំខាងមុខ ។

លោកបាននិយាយថា ក្រុងវ៉ាស៊ីងតោន មិនបានធ្វើការសម្រេចចិត្ត ស្តីពីថាតើនឹងបន្តការផ្អាកការ ធ្វើសមយុទ្ធយ៉ាងសំខាន់ជាមួយកូរ៉េខាងត្បូងសម្រាប់ឆ្នាំខាងមុខនេះ ឬយ៉ាងណានោះទេ ។

លោក ម៉ាតទីស បាននិយាយថា ​យើងនឹងរង់ចាំមើលថាតើ កិច្ចចរចានានានឹងប្រព្រឹត្តិទៅយ៉ាងម៉េច ហើយបន្ទាប់មកយើងនឹងពិចារណាទៅអនាគតថា តើយើងនឹងដំណើរការទៅមុខតាមរបៀបណានោះ។

មន្ទីរប៉ង់តាហ្គោនបាននិយាយពីថ្ងៃទី ២២ ខែមិថុនាថា ខ្លួនបានផ្អាកដោយគ្មានកំណត់កម្មវិធីសមយុទ្ធយោធា ២ ជាមួយកូរ៉េខាងត្បូងដើម្បីគាំទ្រដល់កិច្ចព្រមព្រៀងរវាងប្រធានាធិបតីអាមេរិកលោក ដូណាល់ត្រាំ និងមេដឹកនាំកំពូលកូរ៉េខាងជើង លោក គីម ជុងអ៊ុន ៕ ប្រភពAKP

(ព្រះសីហនុ )-នារសៀលថ្ងៃអង្គារ ២រោច ខែ​ស្រាពណ៍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៨ ខែសីហា ឆ្នាំ២០១៨ ឯកឧត្តម យន្ត មីន អភិបាលនៃគណៈអភិបាលខេត្តព្រះសីហនុ បានអញ្ជើញបើកកិច្ចប្រជុំ​ពិភាក្សា​ការ​រៀបចំយន្តការសម្រាប់ការផ្ដល់សេវារដ្ឋបាល នៃវិស័យរៀបចំដែនដីនគរូបនីយកម្ម សំណង់ និងសុរិយោដី តាមរយៈអង្គភាពច្រកចេញ-ចូលតែមួយរបស់​រដ្ឋបាលខេត្ត​ព្រះសីហនុ ដោយមានចូលរួមពីមន្ទីរ ការិយាល័យដែនដីនគរូបនីយកម្ម សំណង់ និង​សុរិយោដីខេត្ត ក្រុង ស្រុក អភិបាល អភិបាលរងក្រុង ស្រុក និងចៅសង្កាត់ទាំង២៩ ក្នុងខេត្តព្រះសីហនុ ។

របៀបវារៈនៃកិច្ចប្រជុំមាន៨ ទី១-ការចុះបញ្ជីបំពេញបន្ថែម ឬដាច់ដោយដុំ ទី២-ទុតិយតា​ និងតកិយតា, ទី៣-បង្រួមក្បាលដី , ទី៤-ការប្ដូរប្រភេទដី, ទី៥-ឯកសារ​ស្នើសុំលិខិតអនុញ្ញាតសាងសង់កម្រិតក្រោម ៣.០០០ម៉ែត្រក្រឡា , ទី៦-ឯកសារ​ស្នើ​សុំលិខិតបើកការដ្ឋាន (សមត្ថកិច្ចរាជធានី ខេត្ត) , ទី៧-ឯកសារស្នើ​សុំលិខិតបិទ​ការដ្ឋាន (សមត្ថកិច្ចរាជធានី ខេត្ត) និងទី៨ -ឯកសារស្នើសុំលិខិតអនុញ្ញាតជួសជុល (សមត្ថកិច្ចរាជធានី ខេត្ត) ។

ឯកឧត្តម យន្ត មីន អភិបាលខេត្តព្រះសីហនុ មានប្រសាសន៍ថា ដើម្បីឱ្យដំណើរ​ការ​អង្គភាពច្រកចេញ-ចូលតែមួយរបស់សាលាខេត្តព្រះសីហនុ បានប្រព្រឹត្តទៅដោយ​រលូន ដើម្បីជួយសម្រួលសេវាសាធារណ:ជូនប្រជាពលរដ្ឋប្រកបដោយគុណភាព តម្លាភាព និងភាពជឿជាក់ បានសម្រេចប្រគល់ការងារបញ្ជូនឯកសារ​នៅអង្គភាព​ច្រកចេញ-ចូលតែមួយរបស់សាលាខេត្ត ទៅការិយាល័យភូមិបាលក្រុង ស្រុក ដើម្បី​កសាងឯកសារពីថ្នាក់ភូមិ ឃុំ សង្កាត់ប្រកបដោយតម្លាភាព​បម្រើសេវាជូន​ប្រជា​ពលរដ្ឋ ចូលរូមកាត់បន្ថយពេលវេលា និងថវិកា ។

ឯកឧត្តមក៏បានសំណូមពរឱ្យអាជ្ញាធរភូមិ ឃុំ សង្កាត់ ក្រុង ស្រុក ខិតខំបំពេញការ​ងារបម្រើប្រជាពលរដ្ឋឱ្យបានទ្វេដង ព្រោះមន្ត្រីភូមិ ឃុំ សង្កាត់ ជាមន្ត្រីស្នូល​នៅ​តាមមូលដ្ឋាន ធ្វើការបែងចែកការងារចុះនៅជិតនឹងប្រជាពលរដ្ឋ ផ្ដល់សេវា​​ជូនប្រជា​ពលរដ្ឋដោយប្រើយន្តការកែប្រែឥរិយាបថ ធ្វើការងារបម្រើសេវាសា​ធារណៈជូន​ប្រជា​ពលរដ្ឋ ឱ្យស្របតាមសភាពការណ៍ នៃការអភិវឌ្ឍរបស់ខេត្តព្រះសីហនុ ។ ការដឹកនាំ​របស់រដ្ឋបាលមូលដ្ឋានត្រូវអនុវត្តន៍តាមច្បាប់ជាគោល ការពារផលប្រយោជន៍រួម ភាព​ទន់ភ្លន់នាំឱ្យប៉ះពាល់ដល់ការងារក្នុងមូលដ្ឋាន ។ អាជ្ញាធរមូលដ្ឋានមានតួនាទីការពារ​ទ្រព្យ​សម្បត្តិជាតិមានដូចជាព្រៃឈើ អូរ បឹងបួរ  ប្រឡាយ ឆ្នេរសមុទ្រ និងទ្រព្យសម្បត្តិ​សាធារណៈ ដើម្បីឆ្លើយតបទៅនឹងសេចក្ដីត្រូវការក្នុងការពង្រឹងធានាសន្តិសុខ សុវត្ថិភាព​ប្រជាពលរដ្ឋ ស្របតាមគោលនយោបាយភូមិ ឃុំមានសុវត្ថិភាព ៩ចំណុច របស់រាជរដ្ឋាភិបាលកម្ពុជា ៕

(ព្រះសុីហនុ)អាគារពិភពកំសាន្តជីងសុីងមួយកន្លែងនៅខេត្តព្រះសុីហនុត្រូវអគ្គិភ័យឆាប់ឆេះផ្អេីលដល់សមត្ថកិច្ចចេញមកធ្វេីការពន្លត់

សមត្ថកិច្ច បានប្រើរថយន្តទឹក អន្តរាគមន៍ជួយពន្លត់អគ្គីភយ័ដែលឆេះនៅក្នុងអាគារពិភពកំសាន្តជីងសុីង ដែលមានម្ចាស់ជាជនជាតិចិន ស្ថិតនៅតាមផ្លូវឯករាជ្យក្នុងសង្កាត់លេខ៤ ជិតរង្វង់មូលតោ២ វេលាម៉ោងជិត១រសៀលថ្ងៃ២៩សីហា២០១៨នេះ។

ភ្លាមៗគេនៅមិនទាន់ដឹងពីមូលហេតុជាក់លាក់នៅឡើយ ប៉ុន្តែបើយោងតាមរបាយការណ៍បឋមពីសមត្ថកិច្ចបានសន្និដ្ឋានថា អគ្គីភយ័នេះទំនងជាកើតឡើងដោយសារឆ្លងប្រពន្ធ័ភ្លើងពីម៉ាសុីនត្រជាក់ និងថាស្ថានភាពនេះអាចគ្រប់គ្រងបាន មិនរាលដាលធ្ងន់ធ្ងរឬប៉ះពាល់ដល់មនុស្សរងគ្រោះថ្នាក់អ្វីឡើយ៕

នាព្រឹកថ្ងៃពុធ ៣រោច ខែស្រាពណ៌ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ២៩ ខែសីហា ឆ្នាំ ២០១៨ មន្ទីររៀបចំដែនដី នគរូបនីយកម្ម សំណង់ និងសុរិយោដី និងអាជ្ញាធរដែនដី ភូមិ ឃុំ ស្រុក  បានប្រគល់វិញ្ញបនបត្រសម្គាល់ម្ចាស់អចលនវត្ថុ  បងជូនប្រជាពលរដ្ឋ៧០គ្រួសារ រស់នៅភូមគិរីវ័ន្ត ឃុំស្ទឹងឆាយ ស្រុកកំពង់សីលា ខេត្តព្រះសីហនុ ដើម្បី ផ្តល់ភាពងាយស្រួលដល់ប្រជាពលរដ្ឋ ក្នុងការយកប័ណ្ណកម្មសិទ្ធិនេះទៅប្រើប្រាស់ តាមតម្រូវការក្នុងជីវភាពរស់នៅប្រចាំថ្ងៃ។

ក្នុងពិធីប្រគល់វិញ្ញបនបត្រសម្គាល់ម្ចាស់អចលនវត្ថុ  ជូនប្រជាពលរដ្ឋ ភូមគិរីវ័ន្ត ឃុំស្ទឹងឆាយ ស្រុកកំពង់សីលា ខេត្តព្រះសីហនុលោក សោម សុមនោ អនុប្រធានមន្ទីរៀបចំដែនដី នគរូបនីយកម្ម សំណង់ និងសុរិយោដីខេត្ត បានមានប្រសាសន៍ថា មន្ទីររៀបចំដែនដី នគរូបនីយកម្ម សំណង់ និងសុរិយោដី បានប្រគល់ប័ណ្ណកម្មសិទ្ធិ និងវិញ្ញបនបត្រសម្គាល់ម្ចាស់អចលនវត្ថុជាច្រើនប័ណ្ណរួចហើយ ជូនប្រជាពលរដ្ឋនៅតាមបណ្តាភូមិឃុំស្រុកមួយចំនួន ហើយនឹងកំពុងធ្វើបន្តរហូត ។

លោកបានបញ្ជាក់ថា ប័ណ្ណកម្មសិទ្ធិ ឫវិញ្ញបនបត្រសម្គាល់ម្ចាស់អចលនវត្ថុមួយសន្លឹកប្រគល់ជូនបងប្អូននាពេលនេះ គឺមានតម្លៃណាស់សម្រាប់បងប្អូនយកទៅប្រើប្រាស់តាមតម្រូវការប្រចាំថ្ងៃ។  ដូចនេះ សូមបងប្អូនត្រូវចេះថែរក្សា ការពារប័ណ្ណដ៍មានតម្លៃនេះឲ្យបានល្អ និងមានសុវត្ថិភាព។ លោកក៍បានបញ្ជាក់បន្ថែមថា ការផ្តល់ប័ណ្ណឫវិញ្ញាបនបត្រសម្គាល់ម្ចាស់អចលនវត្ថុនេះ គឺស្ថិតក្នុងយុទ្ធសាស្រ្តចតុកោណរបស់រាជរដ្ឋាភិបាល លើវិស័យដីធ្លី គឺធ្វើយ៉ាងឲ្យប្រជាពលរដ្ឋគ្រប់ៗគ្នាទទួលបាននូវប័ណ្ណកម្មសិទ្ធដីធ្លី ។

លោកអនុប្រធានមន្ទីរ រៀបចំដែនដី នគរូបនីយកម្មសំណង់ និងសូយោដី ខេត្តព្រះសីហនុ បានឲ្យដឹងទៀតថា ការចុះបញ្ជីដីធ្លីមានលក្ខណៈជាប្រព័ន្ឋ គឺជាវិធីសាស្រ្តមួយ ដែលធ្វើការចុះបញ្ជី ដីធ្លីបានយ៉ាងច្បាស់ មានប្រសិទ្ឋិភាព មានតម្លាភាព និងធានាបាននូវភាពកក់ក្តៅជូនប្រជាពលរដ្ឋ ដើម្បីកាន់កាប់ដីធ្លី និងធានាសុវត្ថិភាពដីធ្លី។ លោកបន្តថា ការគ្រប់គ្រងដីធ្លីបានល្អ គឺជាមូលដ្ឋានឲ្យរដ្ឋគិតគូរប្រមូលចំណូលចូលថវិកាជាតិបានកាន់តែប្រសើរឡើង។ ម្យ៉ាងទៀត គឺជាការរួមចំណែកយ៉ាងពិតប្រាកដ ក្នុងការអនុវត្តនយោបាយរបស់រាជរដ្ឋាភិបាល ក្នុងការកាត់បន្ថយភាពក្រីក្រ ការអភិវឌ្ឍសង្គមប្រកបដោយចីរភាព។ លោកថា គ្រប់សកម្មភាព មុននឹងចេញប័ណ្ណកម្មសិទ្ធសម្គាល់អចលនវត្ថុ ជូនប្រជាពលរដ្ឋ គឺក្រុមមន្រ្តីជំនាញសុយោដីបានចុះ វាស់វែងក្បាលដីជាច្រើនខែមកហើយ រហូតមកដល់ថ្ងៃនេះ គឺបានប្រគល់ទទួលជាផ្លូវការតែម្តង។

សូមបញ្ជាក់ថា តាំងពីឆ្នាំ២០១២ ប្រជាពលរដ្ឋ មិនទាន់បានទទួលប័ណ្ណកាន់កាប់អចលនវត្ថុ ឫវិញ្ញបនបត្រសម្គាល់ម្ចាស់អចលនវត្ថុ ដែលបានចុះវាស់វែងក្នុងយុទ្ធនាការបទបញ្ជា ០១ របស់សម្តេចតេជោ ហើយកន្លងមកមិនបានចែកប័ណ្ណជូនពួកគាត់ អស់ពេល៦ឆ្នាំ ហើយឥឡូវលោកប្រធានមន្ទីរបានរៀបចំ និងយកប័ណ្ណទាំងអស់ចែកជូនពួកគាត់ ពីព្រោះពួកគាត់ទន្ទឹងរង់ចាំ ៦ឆ្នាំហើយ ៕ ដោយ​ វុន សុខជា