មេក្លោងគ្រឿងញៀនដ៏ធំ ២នាក់ត្រូវកងរាជអាវុធហត្ថខេត្តបន្ទាយមានជ័យ ព័ទ្ធចាប់បាន
ដកហូតគ្រឿងញៀនប្រភេទកេតាមីន (ខេហិត) ចំនួន២៥០ដប

បន្ទាយមានជ័យ៖ ការស្ទាក់ចាប់នេះ សមត្ថកិច្ចធ្វើឡើងនៅម៉ោងប្រមាណ៣ និង៤៥នាទីរសៀល ថ្ងៃទី២០ ខែមិថុនា ឆ្នាំ២០១៨ ចំណុចស្ពានតាផាន់ ស្ថិតក្នុងភូមិសែសិន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។

បើតាមសម្តីកម្លាំងអាវុធហត្ថខេត្តបន្ទាយមានជ័យបានឲ្យដឹងថា មានរថយន្ត១គ្រឿងប្រភេទបាឡែន ដែលសង្ស័យថា រថយន្តនេះបានដឹកជញ្ជូនគ្រឿងញៀន ពីខេត្តបាត់ដំបងឆ្លងកាត់ទៅប្រគល់ឲ្យឈ្មួញធំនៅក្រុងប៉ោយប៉ែត។

លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យបានឲ្យដឹងថា ក្រោយពីទទួលបានព័ត៌មាន ពីករណីដឹកជញ្ជូនគ្រឿងញៀនចេញពីខេត្តបាត់ដំបង លោកក៏បានរៀបកម្លាំងចុះប្រតិបត្តិការពួនស្ទាក់នៅចំណុចខាងលើ។ លុះដល់វេលាកើតហេតុ មុខសញ្ញាក៏ចេញមុខមក ហើយកម្លាំងបានចេញរថយន្តបិទជាប់នៅលើស្ពាន។ បន្ទាប់មកក៏បានបង្ខំឲ្យមុខសញ្ញា២នាក់ចេញពីក្នុងរថយន្ត។

ក្នុងប្រតិបត្តិការពួនស្ទាក់នោះ កម្លាំងអាវុធហត្ថបានឆែកឆេររកឃើញវត្ថុតាងគ្រឿងញៀនមួយកាបូបស្ពាយជាប្រភេទកេតាមីន (ខេហិត) ចំនួន២៥០ដប។

វរសេនីយ៍ឯក ស ប៊ុនសឿង បានឲ្យដឹងទៀតថា ចំពោះជនសង្ស័យទាំង២នាក់ដែលសមត្ថកិច្ចឃាត់ខ្លួន ទី១-ឈ្មោះ ឡាយ ទិត្យសីហា ភេទប្រុស អាយុ២៨ឆ្នាំ រស់នៅភូមិជ្រៃកោង សង្កាត់ស្លាកែត ក្រុងបាត់ដំបង ខេត្តបាត់ដំបង ជាមុខសញ្ញាដឹកជញ្ជូនគ្រឿងញៀន ទី២-ឈ្មោះ ឌឿម មិនា ភេទប្រុស អាយុ២២ឆ្នាំ រស់នៅភូមិគីឡូម៉ែត្រលេខ៤សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ជាអ្នករត់តាក់ស៊ី។

នៅចំពោះមុខសមត្ថកិច្ចឈ្មោះ ឡាយ ទិត្យសីហា បានសារភាពថា គ្រឿងញៀនទាំងអស់នេះគឺ ឈ្មោះ ចែ ដា រស់នៅក្នុងភូមិជាមួយគ្នា ជាអ្នកឲ្យរូបគេយកទៅឲ្យឈ្មោះ ចែ យ៉ា នៅក្រុងប៉ោយប៉ែត អត់ពាក់ព័ន្ធជាមួយអ្នករត់តាក់ស៊ីនោះទេ។

ជនសង្ស័យទាំងពីរនាក់បច្ចុប្បន្ន សមត្ថកិច្ចកំពុងសួរនាំ និងកសាងសំណុំរឿងចាត់ការតាមច្បាប់៕

ភ្នំពេញ ៖ ឈុតក្រៅឆាករបស់បទចម្រៀង “ស្រីមុខលុយ” ដែល បង្ហាញពីរូបភាពស្រើបស្រាលខ្លាំងទទួលបានការរិះគន់មិនសំច្ចៃមាត់ពីសំណាក់ មហាជនជាច្រើនកន្លងមក។ ដំណឹងចុងក្រោយបានលើកឡើងថា ៖ ក្រសួងវប្បធម៏ ត្រៀមកោះហៅសិល្បករ និងផលិតករ នៃបទចម្រៀងមួយនេះមកធ្វើការអប់រំណែនាំឲ្យបញ្ចប់ការ សម្តែងបទចម្រៀងបែបស្រើបស្រាយនោះ។

​រូបភាព​នៃ​ឈុត​ឆាក​ស្រើបស្រាល​ពី​បទ​ចម្រៀង”ស្រី​មុខលុយ” សម្តែងដោយកញ្ញា វ៉ាន់ វលក្ខណ៍ និងដឹកនាំសម្តែងដោយក្រុមផលិតករផលិតកម្ម សាស្ដា បានធ្វើឲ្យលេចចេញការរិះគន់ ខ្លាំងរហូតមហាជនខ្លះប្រដូចទៅនឹងការថតកុនសិច ព្រោះតែ ឈុតឆាកជាច្រើនបង្ហាពីការឱបថើប លូកស្ទាប ស្ទើគ្មានសល់លើរូបរាងកាយ។ កន្លងមកផលិតករប្រចាំផលិតកម្មថោន លោក រិទ្ធ អូមេហ្គា ក៏ធ្លាប់បានរិះគន់ខ្លាំងលើបទចម្រៀងមួយនេះថាជាបទចម្រៀងដែលមានតែឱប ថើបគ្នាលើគ្រែ ក្នុងបន្ទប់ទឹក បែបនេះ ? ។

ធ្វើអ៊ីចឹងទៅទើបល្បី ? ការក្បត់ឧត្ដមកិតិ្ដ វាអាច មានច្រើន រូបភាពមិនចាំបាច់តែមានលុយច្រើន បានគេហៅក្បត់ឧត្ដមកិត្ដិ ទេ ? ចង់ឃើញមុខអ្នកដឹកនាំសម្តែងហ្នឹងមុខម៉េចបានខួរក្បាលគិតចេញតែរឿងអ៊ីចឹង ? ខ្ញុំនិយាយព្រោះខ្ញុំទើស ហើយក្នុងនាមខ្ញុំជាអ្នកផលិតមួយរូបដែរខ្ញុំខ្មាសគេជំនួស ។ គ្មានអ្វីថ្មីបែរជានាំរឿងថោកដល់វិស័យសិល្បៈ មិនបានលើកស្ទួយមកជាន់ពន្លិច យកសិល្បៈជាឈ្នាន់ធ្វើរឿងថោកទាប ។ សុំទោសបើខ្ញុំនិយាយខុស តែខ្ញុំវាទើសភ្នែកពេក ក្រសួង វប្បធម៌គួរចាត់វិធានការលើអ្នកដឹកនាំសម្តែង ឬផលិតកម្មនេះ »។

តាមការបញ្ជាក់ឲ្យដឹងពីមន្ត្រីក្រុមប្រឹក្សាភិបាលវិន័យនៃក្រសួងវប្បធម៌ និងវិចិត្រសិល្បៈបានលើកឡើងថាសំណើរនៃការក្រុមការងារបានធ្វើរួចរាល់ហើយគឺនៅតែការសម្រេចចុងក្រោយរបស់លោកស្រី រដ្ឋមន្ត្រីប៉ុណ្ណោះ។ មន្រ្ដីវប្បធម៏ បាន បញ្ជាក់ថា៖ ប្រសិនបើសំណើរនេះទទួល បានការឯកភាព នោះទាំងសិល្បករ ទាំងផលិតករ នឹងត្រូវអញ្ជើញឲ្យមកទទួលការប្រមាន ពីមន្ត្រីក្រសួងវប្បធម៏ ដើម្បីបញ្ចប់ការផលិតវីដេអូបែបស្រើបស្រាលបន្ត ដែលនាំឲ្យប៉ះពាល់ធ្ងន់ធ្ងរដល់សេចក្តីថ្លៃថ្នូរ និងវប្បធម៌ប្រពៃណី និងប្រាសចាកអំពីការផលិតបែបសិល្បៈនោះ។

ការព្រមាននេះក៏ជាគំរូ ដើម្បីអប់រំដល់សិល្បករ និងផលិតករដទៃ ទៀត ប៉ុន្តែមិនមានការដាក់បម្រាមផ្អាកដល់សកម្មភាពផលិត ឬការសម្តែងរបស់តារាសម្តែងដូចករណីកញ្ញា ដេនី ក្វាន់កន្លងមកនោះទេ ៕

កណ្ដាល ៖ ជារឿងមួយ ដែលថ្មី ហើយប្លែក ដោយបុរសម្នាក់ត្រូវបានសមត្ថកិច្ចស្រាវជា្រវ និងបានឃាត់ខ្លួន នៅថ្ងៃពុធទី២០ ខែមិថុនា ឆ្នាំ២០១៨ ក្រោយធ្វើសកម្មភាពលួច លុយ និងទូរស័ព្ទ រួចធ្វើការ Live វិដេអូ លើគណនីហ្វេសប៊ុក ម្ចាស់ទូរស័ព្ទ កាលពីថ្ងៃទី១៩ ខែមិថុនា ឆ្នាំ២០១៨ វេលាម៉ោង៥.៣០នាទី ចំណុច ភូមិពពែ ឃុំជ្រៃលាស់ ស្រុកពញាឮ ខេត្តកណ្តាល។

ជនរងគ្រោះឈ្មោះរស់ ផល ភេទប្រុស អាយុ៤៣ឆ្នាំជនជាតិខ្មែរ មុខរបរលក់គ្រឿងសំណង់ មានទីលំនៅភូមិពពែ ឃុំជ្រៃលាស់ ស្រុកពញាឮ ខេត្តកណ្តាល បាត់បង់ទ្រព្យសម្បត្តិ រួមមាន ទូរសព្ទ័០១គ្រឿងម៉ាកHUAWEI ពណ៌ស(រកឃើញវិញ)ប្រាក់រៀល ជាង១០មុឺនរៀល ប្រាក់ដុល្លារ ១.០០០ដុល្លារ ។។

ហើយជនសង្ស័យមានគ្នា០២នាក់រួមមានឈ្នោះ ៖

១-ឈ្មោះ អុិត រីម ភេទប្រុស អាយុ២០ឆ្នាំជនជាតិខ្មែរមុខរបរនេសាទ មានទីលំនៅភូមិពពែ ឃុំជ្រៃលាស់ ស្រុកពញាឮ ខេត្តកណ្តាល (ឃាត់ខ្លួន)។

២-ឈ្មោះ សិទ្ធ ភេទប្រុសអាយុ២៤ឆ្នាំជនជាតិខ្មែរមុខរបរមិនពិតប្រាកដ មានទីលំនៅភូមិស្លែងដីដុះឃុំព្រែកតាទែន ស្រុកពញាឮ ខេត្តកណ្តាល (គេចខ្លួន) ។

បើតាមសមត្ថកិច្ចបានប្រាប់ឲ្យដឹងថា នៅថ្ងៃ១៨ខែមិថុនាឆ្នាំ២០១៨វេលាម៉ោង២២.៣០នាទី ជនរងគ្រោះបានត្រឡប់មកពីហូបការគេវិញពេលមកដល់ផ្ទះ ជនរងគ្រោះបាន ដោះសម្លៀកបំពាក់ទុកលើប៉ាវអុី ដោយមានកូនកាបូបទុកលុយមានចំនួន ដូចខាងលើនៅក្នុងហោប៉ៅខោនោះផងដែរ ចំណែកទូរសព្ទ័ជនរងគ្រោះបានដាក់បញ្ចូលថ្មលើតុមុខទូរទស្សន៍ រួចជនរងគ្រោះក៏ដេកលក់នៅលើគ្រែតែម្តងទៅ។

លុះព្រឹកឡើង ថ្ងៃទី១៩ ខែមិថុនា ឆ្នាំ២០១៨ វេលាម៉ោង៥ព្រឹក ជនរងគ្រោះបានភ្ញាក់ពីដំណេក រួចហើយបានយកទូរសព្ទ័នៅកន្លែងបញ្ចូលថ្មស្រាប់តែបាត់មិនឃើញ រួចទៅបានទៅស្ទាបហោប៉ៅខោរបស់ខ្លួនរកកូនកាបូបដាក់លុយស្រាប់តែបាត់លុយមិនឃើញសល់តែកូនកាបូបមានលុយចំនួន ៥០០រៀល ក្នុងកាបូបទុកនៅលើប៉ៅអី លុះដល់វេលាម៉ោង១៣.៣០នាទី ថ្ងៃខែឆ្នាំដដែល កូនរបស់ជនរងគ្រោះបានឆែកមើលfacebook ស្រាប់តែឃើញឈ្មោះ អុិត រីម បាន account Facebook របស់ឪពុកខ្លួនថតបង្ហោះរូបភាពផ្ទាល់ខ្លួន ពេលនោះទើបដឹងថា៖ឈ្មោះ អុិត រីម ជាអ្នកចូលលួចទូរសព្ទ័ បន្ទាប់មក ជនរងគ្រោះក៏បានប្តឹងមកសមត្ថកិច្ចប៉ុស្តិ៍ជ្រៃលាស់ ដោយចោទប្រកាន់ទៅលើជនសង្ស័យដែលមានឈ្មោះខាងលើនោះតែម្ដង បន្ទាប់មកកម្លាំងប៉ុសិ៍្តបានសហការជាមួយកម្លាំងជំនាញឃាត់ខ្លួនជនសង្ស័យនិងវត្ថុតាងទូរសព្ទ័បញ្ជូនមកកាន់អធិការដ្ឋាននគរបាលស្រុកពញាឮដើម្បីសាកសួរ។

តាមចម្លើយសារភាពរបស់ជនសង្ស័យឈ្មោះ អុិត រីម បានសារភាពថា៖ នៅថ្ងៃ១៨ ខែ មិថុនាឆ្នាំ វេលាម៉ោងកើតហេតុខ្លួន និងបក្ខពួកម្នាក់ទៀតឈ្មោះសិទ្ធ បានទិញស្រាបៀរ១យួរផឹកពេលផឹកអស់ស្រាខ្លួនក៏យកថ្នាំញៀនជក់ជាមួយឈ្មោះសិទ្ធ ពេលនោះខ្លួន និងឈ្មោះសិទ្ធិ បាននិយាយគិតគ្នាថានឹងធ្វើសកម្ម ភាពចូលលួចសម្ភារៈ ក្នុងផ្ទះរបស់ជនរងគ្រោះ ដោយពេលនោះខ្លួនជាអ្នកចូលលួចយកបានទូរសព្ទ័ រីឯឈ្មោះ សិទ្ធខ្លួនពុំដឹងថា លួចបានអ្វីខ្លះទេ។បច្ចុប្បន្នជនសង្ស័យឈ្មោះអុិត រីម កំពុងឃាត់ខ្លួននៅអធិការដ្ឋាននគរបាលស្រុកពញាឮដើម្បីកសាងសំណុំរឿងបន្តចាត់ការតាមនីតិវិធី៕

ខេត្តព្រះសីហនុ៖ យុវជនម្នាក់ ក្រោយធ្វើសកម្មភាព លួចកាច់សោរកម៉ូតូ​​​ បានសម្រេចនិងជិះរត់គេច បានប៉ុន្មានម៉ោង ត្រូវម្ចាស់ប្តឹងសមត្ថកិច្ច ស្ទាក់ចាប់បានវិញ នៅវេលាម៉ោង ៥និង៣០នាទី នៅថ្ងៃទី​១៩ ខែមិថុនា ឆ្នាំ២០១៨ ​នៅចំណុច ​ភូមិ៤ សង្កាត់៤ ក្រុង-ខេត្តព្រះសីហនុ។

សមត្ថកិច្ចខេត្តព្រះសីហនុ បានឲ្យដឹងថា ជនរងគ្រោះឈ្មោះ ពៅ សេង ភេទប្រុស អាយុ ៣២ឆ្នាំ មុខរបរ រត់ម៉ូតូកង់បី មានទីលំនៅ ភូមិ៤ សង្កាត់៤ ក្រុង-ខេត្តព្រះសីហនុ បានបាត់ម៉ូតូ​មួយ​គ្រឿង​ម៉ាក ZOOMER X ពណ៌ក្រហម-ស គ្មានស្លាកលេខ បានទុកចោលនៅខាងមុខផ្ទះ ត្រូវបានជនសង្ស័យពីរនាក់ បានធ្វើសកម្មភាពលួច កាច់សោរកម៉ូតូរួចជិះចេញទៅបាត់។ ភ្លាមនោះម្ចាស់ម៉ូតូ បានទៅដាក់ពាក់ប្តឹងសមត្ថកិច្ច ភ្លាមៗ។

សមត្ថកិច្ចបានឲ្យដឹងថា បន្ទាប់ពីទទួលបានពាក្យបណ្តឹង របស់ជនរងគ្រោះ កម្លាំងការិយាល័យ នគរបាលព្រហ្មទណ្ឌកម្រិតធ្ងន់-ស្រាល បានធ្វើការស្រាវជ្រាវ ស៊ើបអង្កេតយ៉ាងយកចិត្តទុកដាក់ រហូតឈានដល់ ការឃាត់ខ្លួនជនសង្ស័យបាន​១នាក់ ក្នុងចំណោម​២នាក់ ឈ្មោះ ស៊ូ ភី ភេទប្រុស អាយុ ១៥ឆ្នាំ មុខរបរ មិនពិតប្រាកដ មានទីលំនៅ មិនពិតប្រាកដ ចំណែកបក្ខពួកម្នាក់ទៀតរត់គេចបាត់ ​។

​វត្ថុតាងចាប់យកបានមាន ម៉ូតូ​១គ្រឿង ម៉ាក ZOOMER X ពណ៌ក្រហម-ស គ្មានស្លាកលេខ ​បានរៀបចំឯកសារ និងប្រគល់ឲ្យម្ចាស់ដើមវិញ ​។ ចំណែកជនសង្ស័យ​ត្រូវនំាយក ទៅការិយាល័យ នគរបាលព្រហ្មទណ្ឌកម្រិតស្រាល ​ចាត់ការតាមនីតិវិធី៕

ដោយ៖ សុវណ្ណ ដេត

ភ្នំពេញ៖ អគ្គីភ័យបានលេបត្របាក់​កុដិ​លេខ៤ មួយខ្នងនៅវត្ត​លង្ការ បណ្តាលឲ្យមានកាភ្ញាក់ផ្អើល ហេតុការណ៍នេះកើតឡើងកាលពី​វេលា​ម៉ោង១និង២០នាទី​រំលងអធ្រាត្រ ឈានចូល​ថ្ងៃទី២០ ខែមិថុនា ឆ្នាំ២០១៨ នៅ​ចំណុច​វត្ត​លង្ការ ស្ថិតក្នុង​សង្កាត់​បឹង​កេងកង​ទី១ ខណ្ឌចំការមន រាជធានី​ភ្នំពេញ។

មុនពេល​កើតហេតុ គេ​បានឃើញ​មាន​ផ្សែងហុយ​ចេញពី​កន្លែង​អាសនៈ​ព្រះ​នៅក្នុង​កុដិ​លេខ៤ ហើយ​បង្ក​ជា​អណ្តាតភ្លើង​ឆាបឆេះ​ឡើង​យ៉ាង​សន្ធោសន្ធៅ​តែម្ដង ទើប​បង្ក​ជាការ​ភ្ញាក់ផ្អើល​ដល់​កូនសិស្សលោក និង​ដូនជី ដែល​សម្រាក​នៅក្នុង​កុដិ នាំគ្នា​យក​បំពង់​ពន្លត់​អគ្គិភ័យ​មក​បាញ់ តែដោយសារ​អណ្តាតភ្លើង​ឆេះ​ខ្លាំងពេក ទើប​នាំគ្នា​រត់​ចេញមកក្រៅ​រាយការណ៍​ទៅ​សមត្ថកិច្ច និង​ហៅ​រថយន្ត​ពន្លត់​អគ្គិភ័យ​មក​អន្តរាគមន៍។ រថយន្ត​ពន្លត់​អគ្គិភ័យ​ជាច្រើន​គ្រឿង បាន​ចេញមក​អន្តរាគមន៍ និង​បាន​ប្រើប្រាស់​អស់​ចំនួន ១៩គ្រឿង ទើប​អាច​គ្រប់គ្រង​ស្ថានការណ៍​បាន​ទាំងស្រុង។

កុដិ​លេខ៤ បាន​រង​ការខូចខាត​អស់​មួយ​ខ្នង​ទាំងស្រុង និង​ទ្រព្យសម្បត្តិ​មួយចំនួនទៀត មាន​ម៉ូតូ​របស់​សិស្ស និង​និស្សិត ដែល​ស្នាក់​នៅក្នុង​វត្ត​ចំនួន៣គ្រឿង ត្រូវបាន​អំណាច​ព្រះ​អគ្គី​លេប​ត្របាក់​ខ្ទេច​អស់​តែម្តង តែ​សំណាង​មិនមាន​មនុស្ស​រងរបួស​នោះទេ។ សមត្ថកិច្ច​បានបញ្ជាក់​ថា គ្រោះ​អគ្គិភ័យ​នេះ បណ្តាលមកពី​ឆ្លង​ចរន្តអគ្គិសនី(ទុស្សេ​ខ្សែភ្លើង)៕

ពេលនេះ ក្មេងស្រីកម្សត់ដែលស្រី្តចិនវាយធ្វើបាបស្ទើរៀងរាល់ថ្ងៃ រាប់ឆ្នាំ គឺ ឈ្មោះ ជា ស្រីនូ ហៅស្រីពៅ ពេលនេះប្អូនស្រីមានការងារថ្មីល្អជាងមុន ដែលប្អូនស្រី កំពុងហ្វឹកហាត់ការងារនៅabc Mart ថ្មី​ ហួសស្ពានព្រែកសំរោងទៅផ្លូវជាតិលេខ1 ។

នេះបើយោងតាមប្រភពម្ចាស់គណនីហ្វេសបុកម្នាក់បានរៀបរាប់ថា ៖ “ជា ស្រីនូ ហៅស្រីពៅ យើងហ្នឹង គេលែងត្រូវគេធ្វើបាបទៀតហើយលែងត្រូវគេវាយ គេមានសេរីភាពហើយគាត់មានការងារជាអ្នកមើលការខុសត្រូវហាងហើយ កំពុងហ្វឹកការងារនៅabc Mart ថ្មី ហួសស្ពានព្រែកសំរោងទៅផ្លូវជាតិលេខ1 គេលែងត្រូវគេធ្វើបាបទៀតហើយ” ។

ភ្នំពេញ៖ អ្នកម្នាង អ៊ុក ផល្លា ជាអតីតតួអង្គអប្សរាស និងតួសុវណ្ណមច្ឆា ដ៏ឆ្នើមក្នុងរបាំព្រះរាជទ្រព្យ នាទសវត្សរ៍ទី៩០ ដែលទទួលបាន ការបង្ហាត់បង្រៀនផ្ទាល់ពីសំណាក់សម្ដេចរាជបុត្រី ព្រះរាម នរោត្ដម បុប្ផាទេវី ជានាដវដ្ដីឯក នៃព្រះបរមរាជវាំង។អ្នកម្នាង អ៊ុក ផល្លា គឺជានាដការដ៏ល្បីល្បាញមួយរូបនៅកម្ពុជា ដែលមហាជនខ្មែរនាអំឡុងទសវត្សរ៍ឆ្នាំ១៩៩០ បានស្គាល់ ។ ជាមួយនឹងចំណង់ចំណូលចិត្ត លើវិស័យសិល្បៈបុរាណខ្មែរ កុមារី អ៊ុក ផល្លា បានចូលហ្វឹកហាត់របាំបុរាណខ្មែរ តាំងពីតូចរហូតបានក្លាយជាសិស្សដ៏គាប់ព្រះទ័យម្នាក់របស់ សម្តេចរាជបុត្រីព្រះរៀម នរោត្តម បុប្ផាទេវី ទេពនាថវដ្តីឯក ។ ជាមួយនឹងការពុះពារតស៊ូគួបផ្សំនឹងទេពកោសល្យដ៏ជំនាញ រួមទាំងរូបឆោមដ៏ស្រស់សោភាផងនោះ កញ្ញា អ៊ុក ផល្លា បានក្លាយជាតួអង្គឯករបាំអប្សរាស ដ៏ល្បីល្បាញប្រចាំប្រទេសកម្ពុជា ពិសេសក្នុងអំឡុងទសវត្សរ៍ឆ្នាំ១៩៩០ តែម្តង ដោយរូបភាពរបស់នាង ត្រូវបានផ្សព្វផ្សាយ នៅលើបណ្តាញព័ត៌មាននានា ក្នុងនាមជានារីរាំរបាំបុរាណដ៏លេចធ្លោ នៅក្នុងប្រទេសកម្ពុជា ។

ជាពិសេសរូបនាងក៏បាន ចូលរួមចំណែកក្នុងការបង្អួតពីរបាំបុរាណ ក៏ដូចជាសិល្បៈវប្បធម៌ខ្មែរ ទៅកាន់មជ្ឈដ្ឋានអន្តរជាតិ តាមរយៈការបង្ហាញខ្លួនដ៏ល្វតល្វន់ នៅលើឆាកតូចធំនានា ប្រកបដោយភាពស្រស់ស្អាត ថ្លៃថ្នូរ និងទេពកោល្យ ។ក្រោយមករូបនាងបានចាកឆ្ងាយ ពីជីវិតជាសិល្បៈករបន្តិចម្តងៗបន្ទាប់ពីបាន ចាប់ផ្តើមជីវិតអាពាហ៍ពិពាហ៍ ជាមួយនឹងសា្វមីដែលជាមន្ត្រីធំមួយរូបរួចមក ។ យ៉ាងណាក៏ដោយ ជីវិតអាពាហ៍ពិពាហ៍នេះ មានរយៈពេលមិនយូរប៉ុន្មានឡើយ ខណៈដែលក្រោយមកទៀត លោកស្រី អ៊ុក ផល្លា ត្រូវបានសម្តេចក្រុមព្រះនរោត្តម រណឬទ្ធិ សព្វព្រះទ័យ និងបានសាងជីវិតគ្រួសារ ជាមួយគ្នារហូតដល់បច្ចុប្បន្ន និងត្រូវបានគេស្គាល់ថាជា អ្នកម្នាង នរោត្តម ផល្លារណឬទ្ធិ ។

ក្នុងជីវិតជាគ្រួសាររាជវង្ស អ្នកម្នាង ទទួលបានបុត្រាពី ២អង្គគឺទ្រង់ នរោត្តម សុធាឬទ្ធិ និងទ្រង់ នរោត្តម រ៉ាណាវង្ស ដែលមានព្រះជន្មមិនទាន់បាន ១០វស្សានៅឡើយ ។ ជាអកុសល អ្នកម្នាង បានទទួលមរណភាព ក្នុងគ្រោះថ្នាក់ចរាចរដ៏អាក្រក់មួយនាថ្ងៃទី១៧ ខែមិថុនា ឆ្នាំ២០១៨ នៅលើទឹកដីខត្តព្រះសីហនុ បន្ទាប់ពីបានរួមដំណើរ ជាមួយព្រះស្វាមី ដើម្បីចុះសួរសុខទុក្ខប្រជាជនដែលជាសមាជិក សមាជិកា គណបក្សហ្វ៊ុនសុិនបុិច ។សូមវិញ្ញាណក្ខន្ធអ្នកម្នាង បានបដិសន្ធិក្នុងឋានសុគតិភពកុំបីឃ្លៀងឃ្លាតឡើយ ។

អ្នកម្នាង អ៊ុក ផល្លា បានទទួលមរណភាពនៅអាយុ៣៩ឆ្នាំ «កើតថ្ងៃទី២៧ ខែកក្កដា ឆ្នាំ១៩៧៩» ហើយអ្នកម្នាងក៏បានឈរឈ្មោះ ជាបេក្ខជនតំណាងរាស្ត្រពេញសិទ្ធិ លំដាប់លេខរៀងទី១ នៃគណបក្សហ្វ៊ុនស៊ិនប៉ិច សម្រាប់មណ្ឌលព្រៃវែង។គ្រោះថ្នាក់ចរាចរ ដែលបានឆក់យកជីវិតរបស់អ្នកម្នាង គឺកើតឡើងនៅលើផ្លូវជាតិលេខ៤ ក្នុងភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ត្រង់គីឡូម៉ែត្រលេខ ២០០-២០១ កាលនៅព្រឹកថ្ងៃទី១៧ មិថុនា ឆ្នាំ២០១៨នេះ ដែលបានបណ្ដាលឱ្យមនុស្សធ្វើដំណើរក្នុងរថយន្ត៧នាក់ផ្សេងទៀត រងរបួសធ្ងន់ និងស្រាល៕

(ព្រះសីហនុ) ដោយសារតែស្ថានភាពរបួសធ្ងន់ធ្ងរពេក អ្នកម្នាង អ៊ុក ផល្លា បានសោយទីវង្គត នៅវេលាម៉ោងជាង១២រសៀលថ្ងៃទី១៧ ខែមិថុនា ឆ្នាំ២០១៨នេះ ក្រោយជួបគ្រោះថ្នាក់ចរាចរណ៍ ជាមួយសម្ដេចក្រុមព្រះ នរោត្តម​ រណឫទ្ធ កាលពីព្រឹកមិញ នៅស្រុកព្រៃនប់ ខេត្តព្រះសីហនុ។

ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានឲ្យដឹងថា នៅរសៀលថ្ងៃនេះថា អ្នកម្នាង អ៊ុក ផល្លា ពិតជាបានសោយទីវង្គត តាំងពីវេលាម៉ោង១២៖២៣នាទី ដោយសាររបួសធ្ងន់ធ្ងរពេក។ ខណៈដែលសម្ដេចក្រុមព្រះ នរោត្តម រណឫទ្ធ ត្រូវបានដឹកតាមឧទ្ធម្ភាគចក្រ មកសង្គ្រោះបន្ដនៅរាជធានីភ្នំពេញ។

សូមបញ្ជាក់ថា សម្ដេចក្រុមព្រះ នរោត្ដម រណឬទ្ធិ ព្រះប្រធានគណបក្សហ៊្វុនស៊ិនប៉ិច នៅព្រឹកថ្ងៃនេះបានជួបគ្រោះថ្នាក់ចរាចរណ៍បណ្តាលឲ្យព្រះអង្គ និងអ្នកម្នាង អ៊ុក ផល្លា រងរបួសធ្ងន់។ គ្រោះថ្នាក់ចរាចរណ៍នេះ បានកើតឡើងនៅអំឡុងម៉ោងជាង ៩ព្រឹកថ្ងៃទី១៧ ខែមិថុនា ឆ្នាំ២០១៨នេះ នៅភូមិអូរតាសេក ឃុំអូរចំណារ ស្រុកព្រៃណប់ ខេត្ដព្រះសីហនុ ខណៈដែលព្រះអង្គកំពុងយាងទៅជួបសំណេះសំណាលជាមួយប្រជាពលរដ្ឋនៅក្នុងខេត្តព្រះសីហនុ៕

រាជធានីភ្នំពេញ ៖ ហេតុការណ៍ដ៏ហួសចិត្តមួយកើតឡើង ខណៈពេលបុរសម្នាក់ កំពុងអង្គុយញាំអីជាមួយមិត្តភ័ក្ត៤នាក់ទៀត​ ក៏ស្រាប់តែលេចមុខបុរសម្នាក់ដែលគេស្គាល់ថា ជាកងអង្គរក្ស BHQ នោះ បានដើរចូលទៅវាយបួនប្រាំដៃកណ្ដាលមុខ បង្កការភ្ញាក់ផ្អើលដល់សន្តិសុខយាមនៅកោះពេជ្រ ចុះមកជួយឃាត់និងនាំខ្លួនបុរសរូបនោះទៅប៉ុស្តិ៍ភ្លាមៗផងដែរ។

ករណីហិង្សារ​នេះបានបង្កការភ្ញាក់ផ្អើលឡើងកាលពីវេលាម៉ោង១០៖៥៥នាទីយប់ ថ្ងៃទី១៥ ខែមិថុនា​ ឆ្នាំ២០១៨ នៅហាងលក់អាហារមួយកន្លែង ក្នុងកោះពេជ្រ ស្ថិតក្នុងសង្កាត់ទន្លេបាសាក់​ ខណ្ឌចំការមន រាជធានីភ្នំពេញ។

បុរសដែលត្រូវគេវាយមានឈ្មោះថា អ៉ិត​ ស៊ាងយី អាយុ៣០ឆ្នាំ មុខរបរ​លក់ទូរស័ព្ទ។

ចំណែកជនដៃដល់ឈ្មោះ នីម សុផានិត អាយុ៣០ឆ្នាំ មុខរបរអង្គរក្ស BHQ ។ អ្នកទាំង២ធ្លាប់រស់នៅស្រុកជាមួយគ្នា ។

តាមសម្តីបុរស ដែលត្រូវគេវាយប្រាប់ឲ្យដឹងថា នៅមុនពេលកើតហេតុ រូបគាត់បាននាំប្រពន្ធចូលមកញាំអីជាមួយមិត្តភ័ក្តិ៤នាក់ ក្នុងហាងមួយកន្លែងនៅកោះពេជ្រ ខណៈពេលកំពុងតែនិយាយឆ្លើយឆ្លងគ្នា និងសើចសប្បាយផងនោះ ក៏ស្រាប់តែមានបុរសម្នាក់ ដែលគាត់ស្គាល់ថាជា អង្គរក្ស​ បានចូលមក​ក្រៀកគាត់ពីក្រោយ រួចស្រែកសួរថា «ហ្អែងហ្នឹងមែនឈ្មោះអាយី?» គាត់មិនទាន់បានឆ្លើយផង បុរសជាអង្គរក្សនោះ បានវាយទះមកលើផ្ទៃមុខគាត់បួនទៅប្រាំដៃ ហើយត្រូវបានមិត្តភ័ក្តដែលអង្គុយជាមួយគ្នាជួយឃាត់ ភ្លាមៗនោះ ក៏មានបុរស២នាក់ទៀតដែលបក្ខពួករបស់អង្គរក្សរូបនោះ បានដើរចូលមកចង្អុលមុខរួចរុញ​ប្រតាយប្រតប់​ជាមួយមិត្តភ័ក្តរបស់គាត់ បង្កការភ្ញាក់ផ្អើលដល់ម្ចាស់ហាងរាយការណ៍ទៅសន្តិសុខកោះពេជ្រចុះមកជួយឃាត់​ រួចនាំយកទៅប៉ុស្តិ៍នគរបាលទន្លេបាសាក់ ដើម្បីប្រគល់អោយសមត្ថកិច្ចដោះស្រាយតាម​នីតិវិធី​ ។

យ៉ាងណាមិញ រឿងរ៉ាវជម្លោះដោយសារតែ​ការ​គុំកួន​នេះ នៅមិនទាន់ត្រូវបានបញ្ចប់នៅឡើយទេ ទោះបីជាមានការសម្របសម្រួលពីសមត្ថកិច្ចក៏ដោយ ព្រោះជនរងគ្រោះកំពុងដាក់ពាក្យបណ្ដឹងនៅប៉ុស្តិ៍នៅឡើយ ៕

(វិដេអូ)

https://www.facebook.com/plugins/video.php?href=https%3A%2F%2Fwww.facebook.com%2Femergencysocailnews%2Fvideos%2F1961751963895535%2F&show_text=0&width=560